బిహార్ అసెంబ్లీ ఎన్నికలకు కాంగ్రెస్ అభ్యర్థుల తొలి జాబితా విడుదల చేసింది. ఆశ్చర్యకరంగా ఈ జాబితాలో ఒక్క మైనార్టీ అభ్యర్థి పేరు కూడా కనిపించలేదు. ఈ నేపథ్యంలోనే లౌకికవాద కాంగ్రెస్.. ఆ వర్గాన్ని సీట్ల కేటాయింపులో పట్టించుకోలేదన్న వాదనలు వినిపిస్తున్నాయి. ఈ తరుణంలో కాంగ్రెస్ పార్టీపై.. మైనార్టీలు అసహనం వ్యక్తం చేస్తున్నారు.
కాంగ్రెస్ విశ్వసనీయత కోల్పోయింది. ఇక్కడ పార్టీ వరుసగా ఓటమి పాలవుతోంది. అదే సమయంలో జేడీయూ, ఆర్జేడీ పుంజుకుంటున్నాయి. కాంగ్రెస్ లేకుండానే పార్టీలు ప్రభుత్వాలు ఏర్పాటు చేస్తున్నాయి. ఈ నేపథ్యంలోనే కాంగ్రెస్ పార్టీ మైనార్టీల్లో నమ్మకం కోల్పోతోంది.
-షామిమ్ హసన్, పట్నా వాసి
కాంగ్రెస్ పార్టీ మైనార్టీలను బానిసల్లాగా చూస్తోంది. పార్టీ చెప్పినట్లుగా వారు ఆడతారని భావిస్తోంది. ప్రస్తుతం మైనార్టీలను వారెలా చిన్నచూపు చూస్తున్నారో కనిపిస్తోంది. ఇప్పుడు ఓటర్లు తెలివిగా అడుగులు వేస్తారు.
-మహ్మద్, పట్నా వాసి
గతంలో కాంగ్రెస్వైపే..
ఎన్నో ఏళ్లుగా బిహార్లోనే కాకుండా.. దేశవ్యాప్తంగా మైనార్టీలు కాంగ్రెస్కే మద్దతుగా ఉన్నారు. బిహార్లో లాలూ ఎంట్రీ తర్వాత.. ముస్లిం ఓటర్లు ఆయనవైపు మళ్లారు. అనంతరం లాలూ ఆర్జేడీ-కాంగ్రెస్ కలిసి పోటీలో దిగుతున్న నేపథ్యంలో గంపగుత్తగా మైనార్టీల ఓట్లు ఈ కూటమికే పడేవి. సీట్ల కేటాయింపుల్లోనూ పార్టీలు ఈ వర్గానికి పెద్దపీట వేసేవి. అయితే, 2020 శాసనసభ ఎన్నికల్లో కాంగ్రెస్ జాబితా అందుకు భిన్నంగా ఉంది.
తాజా ఎన్నికల్లో మహాకూటమి పొత్తుల్లో భాగంగా.. కాంగ్రెస్ పార్టీ 70 స్థానాల్లో బరిలోకి దిగుతోంది. కూటమిలో ప్రధాన పక్షంగా ఉన్న ఆర్జేడీ 144 స్థానాల్లో పోటీ చేస్తుండగా.. వామపక్షాలకు 29 సీట్లు కేటాయించారు.
ఇదీ చూడండి: బిహార్ బరి: ఆర్జేడీ-144, కాంగ్రెస్-70 స్థానాల్లో పోటీ
ప్రాధాన్యం ఉంటుంది..
తొలి జాబితాలో మైనార్టీలకు స్థానం లేకపోవటంపై స్పందించిన కాంగ్రెస్.. పొత్తులో భాగంగా కేటాయించలేకపోయామని, మలి జాబితాల్లో అత్యధికంగా మైనార్టీలను బరిలోకి దించుతామని చెబుతోంది.
పొత్తు కారణంగా.. మొదట దశకు సంబంధించిన 27మంది అభ్యర్థులనే ప్రకటించాం. రెండు, మూడో దశ పోలింగ్కు అభ్యర్థులను ప్రకటించాల్సి ఉంది. వాటిలో మైనార్టీలకు అధిక ప్రాధాన్యం ఇస్తాం.
-ప్రేమ్చంద్ మిశ్రా, బిహార్ కాంగ్రెస్ నేత
ఇదీ చూడండి: బిహార్ ఎన్నికల ప్రచారాల్లో కాంగ్రెస్ అగ్రనేతలు
ప్రత్యర్థుల విమర్శలు
ఇదే అదునుగా ఇతర పార్టీలు.. కాంగ్రెస్ తీరుపై విమర్శలు గుప్పిస్తున్నాయి. సీట్ల పంపకంలో మైనార్టీలకు ప్రాధాన్యం ఇచ్చిన జేడీయూ.. ఇన్నాళ్లూ లౌకికవాదం పేరుతో కాంగ్రెస్ ముస్లింలను మోసం చేసిందని దుయ్యబట్టింది. తమ పార్టీ తరఫున 10% సీట్లు కేటాయించామని చెప్పుకొచ్చింది. అన్ని పార్టీలు ముస్లింలను వంచించాయని.. తాము మాత్రమే వారికి న్యాయం చేయగలమని ఆర్ఎల్ఎస్పీ అధినేత ఉపేంద్ర కుష్వాహా అంటున్నారు.
ఇదీ చూడండి: బిహార్ బరి: జేడీయూ ఎత్తులు.. ఎన్డీఏను గట్టెక్కిస్తాయా ?
మొత్తం రాష్ట్రంలోని ఓటర్లలో 16% ఉన్న ముస్లింలు.. కొన్ని నియోజకవర్గాల్లో ఫలితాలను ప్రభావితం చేసే స్థాయిలో క్రియాశీలకంగా ఉన్నారు.
243 స్థానాలున్న బిహార్ అసెంబ్లీకి మొదటి విడత పోలింగ్.. అక్టోబర్ 28న జరగనుంది.
ఇదీ చూడండి: 'బిహార్లో అప్పటివరకు ఎగ్జిట్ పోల్స్పై నిషేధం'
ఇదీ చూడండి: 40 ఏళ్లలో లాలూ లేకుండా తొలిసారి బిహార్ ప్రచార పర్వం
