పాక్​ దాడుల వల్ల ఫోన్​లోనే ఆజాద్ ప్రసంగం!

కాంగ్రెస్ సీనియర్ నేత గులాం నబీ ఆజాద్​కు జమ్ముకశ్మీర్​ ఎన్నికల ప్రచారంలో ఆటంకం ఏర్పడింది. సరిహద్దుల్లోని లామ్​ గ్రామంలో ప్రచార ర్యాలీకి వెళ్లి ప్రసంగించేందుకు సిద్ధమయ్యారు ఆజాద్. సరిహద్దుల్లో పాక్​ కాల్పులకు తెగబడుతున్నందున ఆజాద్​ను అక్కడికి అనుమతించలేదు. కార్యకర్తలను నిరుత్సాహరపరచకుండా ఫోన్​లోనే ప్రసంగించారు ఆజాద్.

ఎన్నికల ప్రచారం కోసం కాంగ్రెస్ సీనియర్ నేత గులాం నబీ ఆజాద్​ మూడు రోజుల జమ్ముకశ్మీర్ పర్యటనలో ఉన్నారు. పాక్ కవ్వింపు చర్యల నేపథ్యంలో ప్రచారానికి ఆటంకం ఎదురైంది. రాజౌరి జిల్లాలోని లామ్ గ్రామం​లో స్థానిక కాంగ్రెస్​ అభ్యర్థి తరఫున ఆజాద్ నేరుగా ప్రచారంలో పాల్గొనాల్సి ఉంది. అయితే, సరిహద్దులో పాక్​ దాడుల నేపథ్యంలో అధికారులు ఆయన హెలికాఫ్టర్​ లామ్​లో దిగేందుకు అనుమతించలేదు.

జమ్ముకశ్మీర్​ మాజీ ముఖ్యమంత్రి ఆజాద్​ ప్రసంగం వినటానికి 3000 మందికి పైగా ప్రజలు సమావేశానికి హాజరయ్యారు. దాదాపు నాలుగు గంటలపాటు ఆజాద్​ కోసం ఎదురు చూశారు. అయినా ఆయన రాకపోగా... స్థానిక కాంగ్రెస్, నేషనల్​ కాన్ఫరెన్స్​ పార్టీల నేతలు సంయుక్తంగా సమావేశాన్ని నిర్వహించారు.

చివరకు ఆజాద్​ ఫోన్ ద్వారా ప్రసంగించారు. స్థానిక కాంగ్రెస్​ అభ్యర్థిని ఎన్నికల్లో గెలిపించాలని ఓటర్లను కోరారు.