విమానాశ్రయాల ప్రైవేటీకరణకు సంబంధించిన మరిన్ని ప్రతిపాదనలను పౌర విమానయాన శాఖ... కేంద్ర కేబినెట్ ముందు ఉంచనున్నట్లు ఆ శాఖ మంత్రి హర్దీప్ సింగ్ పూరి వెల్లడించారు. ఓ వెబినార్లో పాల్గొన్న ఆయన.. చాలా విమానాశ్రయాలు ప్రైవేటీకరణకు సిద్ధంగా ఉన్నట్లు తెలిపారు.
"ఎయిర్పోర్ట్ ప్రైవేటీకరణ కోసం మేం కేబినెట్ ముందుకు వెళ్తున్నాం. చాలా విమానాశ్రయాలు ఈ(ప్రైవేటీకరణ) వరుసలో ఉన్నాయి. 2030లోపు మొత్తం 100 కొత్త ఎయిర్పోర్టులను నిర్మిస్తాం."
-హర్దీప్ సింగ్ పూరి, పౌర విమానయాన శాఖ మంత్రి
మోదీ ప్రభుత్వ హయాంలో ఇప్పటికే లఖ్నవూ, అహ్మదాబాద్, జైపుర్, మంగళూరు, తిరువనంతపురం, గువాహటి విమానాశ్రయాల నిర్వహణను ప్రభుత్వ- ప్రైవేటు భాగస్వామ్య(పీపీపీ) పద్ధతిలో ప్రైవేటీకరించారు. ఇదే బాటలో అమృత్సర్, వారణాసి, భువనేశ్వర్, ఇండోర్, రాయ్పుర్, తిరుచిరాపల్లి(ట్రిచి) విమానాశ్రయాలను ప్రైవేటుకు అప్పగించాలని ఎయిర్పోర్ట్ అథారిటీ ఆఫ్ ఇండియా సెప్టెంబర్ 2019లో పౌర విమానయాన శాఖకు సిఫార్సు చేసింది.
అదానీకి మరో మూడు నెలలు
పౌర విమానయాన శాఖ ఆధ్వర్యంలో పనిచేసే ఏఏఐ ప్రస్తుతం దేశంలోని 100కు పైగా విమానాశ్రయాల నిర్వహణను పర్యవేక్షిస్తోంది. లఖ్నవూ, అహ్మదాబాద్, మంగళూరు, జైపుర్, తిరువనంతపురం, గువాహటి విమానాశ్రయాల నిర్వహణ హక్కులను 2019 ఫిబ్రవరిలో జరిగిన పోటీ బిడ్లలో అదానీ ఎంటర్ప్రైజెస్ గెలుచుకుంది. తొలి మూడు విమానాశ్రయాలకు సంబంధించి అదే నెల 14న ఒప్పందం సైతం కుదుర్చుకుంది. అయితే మిగిలిన మూడు విమానాశ్రయాలపై ఒప్పందం కుదరలేదు.
కొవిడ్ నేపథ్యంలో అదానీ గ్రుప్కు లఖ్నవూ, అహ్మదాబాద్, మంగళూరు విమానాశ్రయాల నిర్వహణ హక్కులను మరో మూడు నెలలు పొడగించింది ఏఏఐ. ఆగస్టు 12తో ముగిసే గడువు.. నవంబర్ 12 వరకు ముందుకు జరిపింది.
ఏడాది చివరకు రద్దీ సాధారణం!
సోమవారం ఒక్కరోజే 94 వేల మంది ప్యాసెంజర్లు దేశీయ విమానాల్లో ప్రయాణించారని హర్దీప్ సింగ్ పూరి తెలిపారు. కొవిడ్ మహమ్మారికి ముందు రోజుకు 3 లక్షల మంది ప్రయాణించేవారని పేర్కొన్నారు. దీపావళి నాటికి ఇందులో 50-50శాతానికి చేరుకుంటామని వెల్లడించారు. ఈ ఏడాది చివరికి ప్రయాణికుల రద్దీ విషయంలో కొవిడ్ పూర్వ స్థితికి చేరుకుంటామని స్పష్టం చేశారు.
మరిన్ని దేశాలతో 'వాయు బుడగ'
అంతర్జాతీయ విమాన సర్వీసులలో ప్రత్యేక వాయు బుడగ(ఎయిర్ బబుల్) ఏర్పాట్లు చేయాలని ఆస్ట్రేలియా, జపాన్, సింగపూర్ సహా మొత్తం 13 దేశాలతో చర్చలు జరుపుతున్నట్లు మంత్రి హర్దీప్ తెలిపారు. పొరుగు దేశాలైన శ్రీలంక, బంగ్లాదేశ్, అఫ్గానిస్థాన్, నేపాల్, భూటాన్ దేశాలతోనూ ఈ ఎయిర్బబుల్ ప్రతిపాదన చేసినట్లు మంత్రి తెలిపారు. వీటితో పాటు ఇటలీ, న్యూజిలాండ్, నైజీరియా, బహ్రెయిన్, ఇజ్రాయెల్, కెన్యా, ఫిలిప్పీన్స్, రష్యా, దక్షిణ కొరియా, థాయ్లాండ్ దేశాలు ఈ జాబితాలో ఉన్నాయి. ఇతర దేశాలతోనూ మరిన్ని ద్వైపాక్షిక ఒప్పందాలు చేసుకునేందుకు ప్రభుత్వం ప్రయత్నిస్తోందని మంత్రి స్పష్టం చేశారు.
ఈ వాయు బుడగ ఒప్పందం ద్వారా ఇరుదేశాల ఎయిర్లైన్లు పలు ఆంక్షలతో అంతర్జాతీయ సర్వీసులు ప్రారంభించేందుకు అవకాశం లభిస్తుంది. ఈ దిశగా ఇప్పటికే ప్రయత్నాలు ప్రారంభించింది కేంద్రం. అమెరికా, యూకే, ఫ్రాన్స్, జర్మనీ, యూఏఈ, ఖతార్, మాల్దీవులతో భారత్ ఈ ఒప్పందాన్ని చేసుకుంది.
ఇదీ చదవండి- 'బంగాలీ ఆత్మగౌరవం' దీదీని గెలిపించేనా?
