ఈశాన్య రాష్ట్రాలను ముంచెత్తిన వరదలు

ఈశాన్య రాష్ట్రాలు అసోం, అరుణాచల్​ ప్రదేశ్​లను భారీ వర్షాలు ముంచెత్తాయి. లోతట్టు ప్రాంతాలు నీట మునిగాయి. కొన్ని చోట్ల కొండచరియలు విరిగిపడి పలువురు గాయపడ్డారు.

అసోం, అరుణాచల్​ ప్రదేశ్​ రాష్ట్రాలను భారీ వర్షాలు ఉక్కిరిబిక్కిరి చేస్తున్నాయి. లోతట్టు ప్రాంతాల్లోని గ్రామాలు చెరువులను తలపిస్తున్నాయి. విద్యుత్​ సరఫరాకు అంతరాయం ఏర్పడింది. రవాణా వ్యవస్థ దెబ్బతింది. ప్రజలు తీవ్ర ఇబ్బందులు పడుతున్నారు.

అరుణాచల్​ ప్రదేశ్​..

గోహ్​పుర్ నగరానికి సమీపంలోని ఓ గ్రామంలో కొండచరియలు విరిగిపడ్డాయి. పెద్ద పెద్ద బండరాళ్లు సమీపంలోని ఇంటిపై పడి పలువురు గాయపడ్డారు. క్షతగాత్రులను ఆసుపత్రికి తరలించి చికిత్స అందిస్తున్నారు. ఖరోయ్​ నది ఉగ్రరూపం దాల్చింది. నదీతీరం కోతకు గురవటం వల్ల 20 గ్రామాలు నీట మునిగాయి. అందులో బొరసుక్​, హొలమోరా, పిసోలా, నామ్​ పిలోసా, ఖరోయ్​గురి గ్రామాలు ఉన్నాయి.

అసోం...

అసోంలో భారీ వర్షాలకు జనోయ్​ నగరం నీట మునిగింది. వరదలకు మోహ్మారా, కోప్లాంగ్​ మోహ్మారా, బహిర్​ జోనాయ్​ రత్నాపుర్​, ఆక్లాండ్​ గ్రామాలు చెరువులను తలపిస్తున్నాయి. నదీ పరివాహ ప్రాంతాల్లోని గ్రామాలు జలమయమయ్యాయి.

ఇదీ చూడండి: కన్నడనాట సంక్షోభం: ముంబయిలో హైడ్రామా