కరోనాపై పోరులో విజయం సాధించడానికి వైద్య పరిశోధకులు వివిధ మార్గాలను అన్వేషిస్తున్నారు. తాజాగా ఛండీగఢ్లోని పోస్ట్ గ్రాడ్యుయేషన్ ఇన్స్టిట్యూట్ ఆఫ్ మెడికల్ ఎడ్యుకేషన్ అండ్ రీసర్చ్(పీజీఐఎమ్ఈఆర్)లో.. వైరస్ చికిత్సకు యాంటీ లెప్రసీ వ్యాక్సిన్ను ఉపయోగించారు. ఈ ట్రయల్స్ ఫలితాలు సంతృప్తికరంగా ఉన్నాయని తెలిపారు నిపుణులు.
నలుగురు రోగులకు కుష్టు వ్యాధి నివారణ వ్యాక్సిన్ అయిన మైకోబాక్టీరియమ్ డబ్ల్యూ (ఎమ్డబ్ల్యూ)ను 0.3ఎమ్ఎల్ చొప్పున మూడు రోజుల పాటు అందించినట్టు వివరించారు ప్రొఫెసర్ జగత్రామ్.
"లెప్రసీ, క్షయ, నిమోనియా బాధితులపై ఇది ప్రయోగించినప్పుడు ఎలాంటి సైడ్ ఎఫెక్ట్స్ను మేము గుర్తించలేదు. దిల్లీ ఎయిమ్స్, భోపాల్ ఎయిమ్స్ దీనిపై క్లినికల్ ట్రయల్స్ నిర్వహిస్తాయి. ప్రస్తుతానికి నలుగురిపై ఈ వ్యాక్సిన్ను ప్రయోగించాం. త్వరలోనే ఇతర రోగులకు దీనితో చికిత్స చేస్తాం."
--- ప్రొఫెసర్ జగత్రామ్, పీజీఐఎమ్ఈఆర్.
బాధితుల్లో రోగ నిరోధక శక్తిని పెంచడానికి ఎమ్డబ్ల్యూను ఉపయోగిస్తున్నట్టు వివరించారు మరో ప్రొఫెసర్ రితేశ్ అగర్వాల్ .
"వ్యాక్సిన్ ప్రయోగించే రోగులకు కృత్రిమ శ్వాస అందించాం. సాధారణంగా వైరస్ మనిషి శరీరంలోకి ప్రవేశిస్తే రోగ నిరోధక కణాలు దాన్ని అడ్డుకుంటాయి. కానీ బాధితుడి ఆరోగ్య పరిస్థితి విషమిస్తే.. రోగ నిరోధక కణాలు సరిగా పోరాడలేవు. అందుకే వాటిలో శక్తిని పెంచడానికి ఈ ఎమ్డబ్ల్యూ వాడుతున్నాము. ఈ చికిత్సకు ఎంత ఆక్సిజన్ అవసరమో చూడాలి. ఏదైనా సైడ్ ఎఫెక్ట్స్ ఉంటాయో లేదో తెలుసుకోవడానికి వారిని నిరంతరం పర్యవేక్షిస్తున్నాం."
--- పీజీ రితేశ్ అగర్వాల్, ప్రొఫెసర్ పీజీఐఎమ్ఈఆర్.
అనేక మందిపై ఇప్పటికే సెఫ్టీ ట్రయల్స్ చేసినట్టు.. ఇక మరణాల రేటుపై ఈ ఎమ్డబ్ల్యూ ఏ మేరకు ప్రభావం చూపుతుందో పరిశీలించాలని పేర్కొన్నారు మరో ప్రొఫెసర్ దిగంబర్ బెహెరా. ఎంత మొత్తంలో ఈ మందును వాడుతున్నామన్నదీ ముఖ్యమేనని అభిప్రాయపడ్డారు. ట్రయల్స్ పూర్తయ్యాక వీటిపై స్పష్టత వస్తుందన్నారు.
ఇదీ చూడండి- పౌరులంతా సైనికులే.. అందరికీ సెల్యూట్: మోదీ
