దేశీయ విమానయాన సంస్థ ఎయిర్ ఇండియా సరికొత్త రికార్డు నెలకొల్పింది. ప్రపంచంలో 'ట్యాక్సీబాట్' సేవలు వినియోగించిన మొట్టమొదటి విమానయాన సంస్థగా నిలిచింది. ట్యాక్సీబాట్ సాయంతో.. ప్రయాణికులు ఉన్న విమానాన్ని పార్కింగ్ బే నుంచి రన్వే వరకు విజయవంతంగా తీసుకొచ్చింది.
ఎయిర్ ఇండియా ఛైర్మన్, మేనేజింగ్ డైరెక్టర్ అశ్వినీ లోహణి ఇవాళ ఉదయం దిల్లీ విమానాశ్రయంలో ట్యాక్సీబాట్ సేవలు ప్రారంభించారు. ముంబయి వెళ్తున్న ఏఐ665 విమానాన్ని.. టెర్మినల్-3 నుంచి రన్వే వరకు ట్యాక్సీబాట్ విజయవంతంగా తీసుకొచ్చింది.
ట్యాక్సీబాట్ అంటే?
రోబో సాయంతో నడిచే ఎయిర్క్రాఫ్ట్ ట్రాక్టర్ను ట్యాక్సీబాట్ అంటారు. అయితే ఈ రోబో... పైలట్ నియంత్రణతో పనిచేస్తుంది. ట్యాక్సీబాట్ సాయంతో విమానం ఇంజిన్ ఆన్ చేయకుండానే.. పార్కింగ్బే నుంచి రన్వే వరకు, అలాగే రన్వే నుంచి పార్కింగ్ బే వరకు తీసుకురావొచ్చు. దీని ద్వారా ఎంతో విలువైన ఇంధనం ఆదా అవుతుంది.
ప్రస్తుతానికి దిల్లీ విమానాశ్రయం నుంచి వెళ్లే(డిపార్ట్) విమానాల కోసమే ట్యాక్సీబాట్ సేవలు వినియోగిస్తున్నట్లు అధికారులు తెలిపారు.
ఇదీ చూడండి : భారత్కు ఫిదా- యునెస్కో నాలుగు అవార్డులు
