దిల్లీలోని ఎయిమ్స్ పారిశుద్ధ్య విభాగానికి చెందిన పర్యవేక్షక అధికారి కరోనా వైరస్తో మరణించారు. పరిస్థితి విషమించడం వల్ల ఆయనను వెంటిలేటర్ మీద ఉంచి చికిత్స అందించినట్లు అధికారులు తెలిపారు. అయితే ఇన్ఫెక్షన్ తీవ్రమవడం వల్ల ఆదివారం రాత్రి 7.30 గంటల సమయంలో ప్రాణాలు కోల్పోయినట్లు వెల్లడించారు.
"మరో కరోనా యోధుడు దేశ సేవ కోసం ప్రాణాలు త్యాగం చేశాడు. ఓ గొప్ప యోధుడిని ఎయిమ్స్ కోల్పోయింది. ఈ వైరస్ చాలా ప్రమాదకరమైనది, ఎవరినీ వదలడం లేదు."
-కుల్దీప్ ధిగాన్, ఎయిమ్స్ జనరల్ సెక్రెటరీ
జ్వరం, శ్వాసకోశ సమస్యలు వంటి లక్షణాలు కనిపించడం వల్ల సదరు పర్యవేక్షకుడు మే 16న ఎయిమ్స్లోనే పరీక్షలు చేయించుకున్నట్లు తెలిపారు కుల్దిప్. అతని కేసు కొవిడ్ పరీక్షల పరిధిలోకి రాలేదని.. సాధారణ చికిత్స నిర్వహించి ఇంటికి పంపినట్లు వెల్లడించారు. ఆ తర్వాత లక్షణాలు తీవ్రం కావడం వల్ల మే 19న అతడిని ఆస్పత్రిలో చేర్చి పరీక్షలు నిర్వహించగా.. పాజిటివ్గా తేలినట్లు చెప్పారు.
ఈ నేపథ్యంలో వైరస్ పోరాటంలో ముందువరుసలో ఉన్న వారందరికీ.. కాస్త అనుమానాలు వచ్చినా పరీక్షలు చేయాలని అన్నారు కుల్దీప్. సరైన జాగ్రత్తలు తీసుకుంటున్నప్పటికీ వైద్య సేవల సిబ్బందికి వైరస్ వ్యాప్తి ప్రమాదం అధికంగా ఉంటుందని పేర్కొన్నారు. ఈ పరిస్థితుల్లో సిబ్బంది సమస్యలపై చర్చించడానికి ఎయిమ్స్ డైరెక్టర్తో మంగళవారం సమావేశం కానున్నట్లు తెలిపారు.
గత వారం ఎయిమ్స్లోని ఆర్పీసీ క్యాంటీన్కు చెందిన ఓ వ్యక్తి కరోనాతో మృతి చెందినట్లు అధికారులు తెలిపారు.
