దేశంలో కరోనా టీకా పంపిణీ రెండు రోజుల్లో ప్రారంభం కానుంది. ఇప్పటికే రాష్ట్రాలకు వ్యాక్సిన్లు చేరుకుంటున్నాయి. తొలిరోజు దేశవ్యాప్తంగా సుమారు 3 లక్షల మంది ఆరోగ్య సిబ్బందికి టీకా అందించనున్నట్లు కేంద్ర వైద్య, ఆరోగ్య శాఖ అధికారవర్గాలు తెలిపాయి. ఇందుకోసం మొత్తం 2,934 కేంద్రాల్లో ఏర్పాట్లు పూర్తి చేసినట్లు వెల్లడించాయి.
ఒక్కో సెషన్లో గరిష్ఠంగా 100 మందికి టీకా ఇవ్వనున్నారు. ఈ క్రమంలో రోజులో ఎక్కువ మందికి టీకా ఇచ్చేందుకు ప్రయత్నించొద్దని రాష్ట్రాలకు సూచించింది కేంద్రం. వ్యాక్సినేషన్ ప్రక్రియ సజావుగా సాగుతున్న క్రమంలో టీకా సెషన్స్ను పెంచుకుంటూ పోవాలని కోరింది. అలాగే.. ప్రతి సెషన్లో 10 శాతం టీకాలు రిజర్వ్ లేదా వృథాగా పరిగణించాలని పేర్కొంది.
"జనవరి 16న దేశవ్యాప్తంగా 2,934 కేంద్రాల్లో సుమారు 3 లక్షల మంది కరోనా యోధులకు టీకా అందించనున్నాం. అయితే.. రెండు టీకాల్లో ఏది తీసుకోవాలనేది ఎంచుకునే వీలులేదు. "
- కేంద్ర, వైద్య ఆరోగ్య శాఖ అధికారవర్గాలు
ప్రస్తుతం 1.65 కోట్ల టీకా డోసులను కొనుగోలు చేసింది కేంద్రం. అందులో 1.1 కోట్ల డోసులు కోవిషీల్డ్, 55 లక్షలు కొవాగ్జిన్ డోసులు ఉన్నాయి. ఇప్పటికే 2.4 లక్షల కొవాగ్జిన్ డోసులు 12 రాష్ట్రాలకు చేరుకున్నాయి.
ఇదీ చూడండి: టీకా పంపిణీ ప్రక్రియను ప్రారంభించనున్న మోదీ
