డ్రైవర్​కు కారు గిఫ్ట్​గా ఇచ్చిన యజమాని

ఇంట్లో పనిచేస్తున్న డ్రైవర్లకు యజమానులు సాధారణంగా ఆర్థిక సాయం చేస్తుంటారు. మరీ అభిమానముంటే వారి పిల్లల్ని చదివించడం లాంటివి చేస్తుంటారు. కానీ.. గత 26 ఏళ్లుగా యజమాని కుటుంబంపైనే ఆధారపడిన డ్రైవర్​కు ఏకంగా రూ.6 లక్షల విలువైన కారునే బహుమానంగా ఇచ్చారు ఓ వ్యాపారవేత్త!

ప్రసాద్​... ఓ సాధారణ వ్యక్తి. కేరళ మలప్పురానికి చెందిన మహ్మద్ కుట్టి అనే వ్యాపారవేత్త వద్ద డ్రైవర్​. ప్రసాద్​ తల్లి కూడా మహ్మద్​ ఇంట్లోనే 26 ఏళ్లుగా పనిచేస్తున్నారు. ఇలా.. ఆ​ కుటుంబమంతా కొన్నేళ్లుగా యజమానిపైనే ఆధారపడి జీవనం సాగిస్తున్నారు. వారి పిల్లలు కూడా ఆ కుటుంబానికి దగ్గరయ్యారు. యజమాని, పనివాళ్లు అనే తేడా లేకుండా కలిసిపోయారు.

ప్రసాద్​ కుటుంబం తమ పట్ల దశాబ్దాలుగా చూపిస్తున్న విశ్వాసం, అభిమానానికి ముగ్ధుడయ్యారు కుట్టి. కృతజ్ఞతగా రూ. 6 లక్షలు విలువైన కారును బహుమానంగా ఇచ్చారు. యజమాని ఇచ్చిన అనూహ్య కానుకతో ఒక్కసారిగా షాక్​ అయ్యారు ప్రసాద్​ కుటుంబసభ్యులు. కొత్తకారులో ఆనందంగా షికార్లు కొడుతున్నారు.

ఇదీ చదవండి: చక్రాల్లోకి చున్నీ వెళ్లకుండా మార్చేస్తారట!