దేశవ్యాప్తంగా 'పల్స్‌ పోలియో' కార్యక్రమం విజయవంతంగా సాగింది. శనివారం సాయంత్రం రాష్ట్రపతి భవన్లో రాష్ట్రపతి రామ్నాథ్ కోవింద్.. ఐదేళ్లలోపు చిన్నారికి పోలియో చుక్కలు వేసి కార్యక్రమాన్ని ప్రారంభించారు. ఆదివారం.. పోలియో నేషనల్ ఇమ్యునైజేషన్ డేను పురస్కరించుకుని నిర్వహించిన ఈ కార్యక్రమంలో 89లక్షల మంది చిన్నారులకు పోలియో చుక్కలు వేసినట్లు కేంద్ర ఆరోగ్య మంత్రిత్వశాఖ తెలిపింది.
ఈ కార్యక్రమంలో ఏడు లక్షల బూత్ల్లో 12 లక్షల మంది సిబ్బంది, 1.8 పర్యవేక్షకులు పాల్గొన్నట్లు అధికారులు వెల్లడించారు. కరోనా ఆంక్షల నడుమ.. కట్టుదిట్టమైన చర్యలతో ఈ కార్యక్రమాన్ని నిర్వహించినట్లు పేర్కొన్నారు.
వీలుపడనవారికి మళ్లీ..
ఈ కార్యక్రమంలో పోలియో చుక్కలు వేయించుకోవడానికి వీలుపడని చిన్నారుల కోసం వచ్చే రెండు నుంచి ఐదురోజుల్లో ఇంటింటికి తిరిగి పోలియో చుక్కలు వేయిస్తామని ఆరోగ్యశాఖ పేర్కొంది. ఏ చిన్నారి.. పోలియో బారిన పడకూడదనే ఉద్దేశంతో రైల్వే స్టేషన్లు, బస్స్టేషన్లు విమానాశ్రయాల్లో పోలియో బూత్లు ఏర్పాటు చేసినట్లు అధికారులు తెలిపారు.
పక్కదేశాల నుంచి ప్రవేశించకుండా..
భారత్.. గత దశాబ్ద కాలంగా పోలియో రహిత దేశంగా కొనసాగుతోంది. పొరుగు దేశాలైన పాకిస్థాన్, అఫ్గానిస్థాన్ నుంచి పోలియో దేశంలోకి ప్రవేశించకుండా నిరోధించడానికి అధికారులు చర్యలు చేపడతున్నారు. దీనిలో భాగంగా ఏటా పోలియో చుక్కల కార్యక్రమాన్ని నిర్వహిస్తున్నారు.
ఇదీ చూడండి: ఫిబ్రవరి 13 వరకే రాజ్యసభ కార్యకలాపాలు!
