కరోనా వ్యాప్తి నియంత్రణకు విధించిన లాక్డౌన్ వల్ల రోజువారీ కూలీల ఆకలి తీర్చేందుకు వినూత్న కార్యక్రమం చేపట్టారు దిల్లీ యువత. వీరు ప్రారంభించిన 'హ్యాష్ట్యాగ్50మీల్ప్యాక్ఛాలెంజ్'కు పోలీసులు కూడా సాయం చేశారు. ఈ కార్యక్రమం ప్రారంభించిన వారంలోపే దాదాపు 5 లక్షల మీల్ ప్యాకెట్లను పేదలకు పంచిపెట్టినట్లు నిర్వాహకులు తెలిపారు.
50మీల్ ప్యాక్ ఏమిటి?
నిరాశ్రయులైన పేదలు, వలస కూలీలు, రోజువారీ కూలీలకు ఆహార ధాన్యాలు, 50 మీల్స్కు సరిపడా బియ్యంతో పాటు మరిన్ని నిత్యావసర సరకులు పంచిపెట్టేందుకు ఏర్పాటు చేసిన కార్యక్రమమే ఈ 50మీల్ ప్యాక్ ఛాలెంజ్.
రాష్ట్రవ్యాప్తంగా విస్తరిస్తున్న ఆకలి సమస్యను అధిగమించేందుకు సరికొత్త పద్ధతిని అవలంబించారు నిర్వాహకులు. సరుకులు, ఆహార సరఫరాకు ఎలాంటి ఆటంకం కలగకుండా ఉండేందుకు రాష్ట్ర యంత్రాంగం సహాయం తీసుకున్నారు. అలాగే దిల్లీ పోలీసులు, నేషనల్ అగ్రికల్చరల్ కోఆపరేటివ్ మార్కెటింగ్ ఫెడరేషన్ ఆఫ్ ఇండియా లిమిటెడ్(ఎన్ఏఎఫ్ఈడీ)తో పాటు ఓ పబ్లిక్ సెక్టార్ అండర్టేకింగ్(పీఎస్యూ) సాయం కూడా తీసుకున్నారు.
