ఉత్తరాది రాష్ట్రాలు బిహార్, అసోంలలో వరదల బీభత్సం కొనసాగుతోంది. శుక్రవారం ఒక్క రోజే రెండు రాష్ట్రాల్లో 9 మంది మృతి చెందారు. ఫలితంగా మృతుల సంఖ్య 207కు చేరింది. బిహార్లో 13, అసోంలో 17 జిల్లాల్లో జల విలయం కొనసాగుతోంది.
వరదల ధాటికి బిహార్లో 127 మంది, అసోంలో 80 మంది ప్రాణాలు కోల్పోయారు.
అసోం..
రాష్ట్రంలోని కురిచ్చు నది ఉద్ధృతితో బార్పేట, నల్బారి, బక్సా, చిరాంగ్, కొక్రాఝర్, దుబిడీ, దక్షిణ సల్మారా జిల్లాలు నీట మునిగాయి. 17 జిల్లాల్లోని 2,078 గ్రామాల్లో సుమారు 27.15 లక్షల మంది వరద ప్రభావానికి గురయ్యారు. 768 శిబిరాలను ఏర్పాటు చేసి బాధితులకు సహాయం అందిస్తున్నారు. రాష్ట్రంలోని బ్రహ్మపుత్ర, జియా భరాలి, పుథిమరి, మనాస్, బేకి నదులు ప్రమాదకర స్థాయిలో ప్రవహిస్తున్నాయి.
బిహార్...
బిహార్లోని పలు జిల్లాల్లో వరదల ఉద్ధృతి కొనసాగుతోంది. ఒక్క శుక్రవారమే నలుగురు ప్రాణాలు కోల్పోయారు. మృతుల్లో దర్భంగ జిల్లాలో ఇద్దరు, కిషన్గంజ్లో ఇద్దరు ఉన్నారు. 13 జిల్లాల్లో 82.84 లక్షల మంది వరదల ప్రభావానికి గురయ్యారు.
కేంద్ర సాయం కోసం...
రాష్ట్రంలో వరదల నష్టాన్ని అంచనా వేసేందుకు ప్రత్యేక బృందాన్ని పంపాలని త్వరలోనే కేంద్ర ప్రభుత్వానికి లేఖ రాయనున్నట్లు రాష్ట్ర అసెంబ్లీకి తెలిపారు ముఖ్యమంత్రి నితీశ్ కుమార్. వారి నివేదిక ప్రకారం కేంద్రం నుంచి తగిన సాయం అందించాలని కోరనున్నామని చెప్పారు.
ఇదీ చూడండి: జలపాతంతో భద్రం.. వీళ్లిలా బతికి బైట పడ్డారు!
