చిన్నారి గూగుల్​ గురూ.. అప్పుడే రికార్డుల వేట షురూ!

ఉత్తర్​ప్రదేశ్​కు చెందిన ఆ బుడతడు పుట్టి రెండున్నరేళ్లే. కానీ, ప్రతిభకు వయస్సుతో నిమిత్తం లేదని నిరూపించాడు. దేశాల రాజధానుల పేర్లు టకటకా చెప్పేసి ప్రపంచ రికార్డులు సృష్టించేశాడు. గూగుల్​ కంటే వేగంగా సమాధానాలు చెప్పేస్తూ గూగుల్​ గురూగా పేరు తెచ్చుకున్నాడు.

ఉత్తర్​ప్రదేశ్​ మథురలోని బృందావన్​కు చెందిన రెండున్నరేళ్ల చిన్నారి గురూ ఉపాధ్యాయ్​ సాటిలేని జ్ఞాపక శక్తితో గూగుల్ ​గురూగా గుర్తింపు పొందాడు. ఏసియా బుక్​ ఆఫ్​ వరల్డ్ రికార్డ్స్​, ఇండియా బుక్​ ఆఫ్​ రికార్డ్స్​తో పాటు మరెన్నో రికార్డులు సృష్టించి వారెవా అనిపిస్తున్నాడు.

అరవింద్ ఉపాధ్యాయ్, ప్రియా​ల కుమారుడు గురూ ఉపాధ్యాయ్. సరిగ్గా మాటలు కూడా రావు. బుజ్జి బుజ్జి పలుకులతోనే వివిధ దేశాల పేర్లు, వాటి రాజధానుల్ని చకచకా చెప్పేస్తాడు గురూ. జాతీయ జెండాలనూ గుర్తుపట్టేస్తాడు. బుడిబుడి అడుగులు వేస్తూనే.. అమ్మ అడిగిన వాటన్నింటికీ అక్షరం తడబడకుండా సమాధానాలు చెప్పేస్తాడు. 45కు పైగా దేశాల రాజధానులను గూగుల్​లో వెతికేలోపే తాను చెప్పేస్తాడు. అందుకే మరి స్థానికులంతా ఈ బుజ్జిగాడిని గూగుల్​ గురూ అని పిలుస్తారు.

బుడతడి జ్ఞాపకశక్తికి ప్రపంచ రికార్డులు దాసోహం అయ్యాయి. ఇంత చిన్న వయస్సులో తమ పేరు నిలబెడుతున్నందుకు ఆనందంలో మునిగి తేలుతున్నారు ఆ దంపతులు.

"గురూ వయస్సు రెండేళ్ల ఐదు నెలల 11 రోజులు మాత్రమే. ఇప్పుడు తాను ఇండియా బుక్​ ఆఫ్ రికార్డ్స్​లో, గ్లోబల్​ రికార్డ్​ అండ్​ రీసెర్చ్​ ఫౌండేషన్​లో పేరు నమోదు చేసుకున్నాడు. మొదటి రికార్డులో ఒక్క నిమిషంలో 45 దేశాల రాజధానులు చెప్పాడు. రెండోది ఒక్క నిమిషంలో 15 జాతీయ జెండాలను గుర్తుపట్టేశాడు. నేను, నా భర్త సివిల్​ సర్వీసెస్​ పరీక్షకు సిద్ధమౌతున్నాం. అలా మేమిద్దరం పరీక్ష గురించి చర్చించుకునేటప్పుడు గురూ చాలా జాగ్రత్తగా వినేవాడు."

- ప్రియా ఉపాధ్యాయ, గురూ తల్లి

ఇదీ చదవండి:గుడి దగ్గర మహిళ నగ్న మృతదేహం.. ఆమె తల ఎక్కడ