తెల్లవారుజామున నీళ్లు తాగుదామని లేచేసరికి.. ఇంట్లో ఏదో అలజడి. అనుమానం వచ్చి చూసేసరికి వంటింట్లో ఏడుగురు దోపిడీ దొంగలు.. కిచెన్లోకి అడుగు పెట్టగానే దాడి చేసేందుకు సిద్ధంగా ఉన్నారు. ఈ సన్నివేశాన్ని చూసిన ఎవరైనా భయపడి హడావుడి చేస్తారు. కానీ వీరిని గమనించిన ఆ ఇంటి యజమాని ధైర్యంగా, చాకచక్యంగా వ్యవహరించాడు. కేవలం చేతిలో ఉన్న స్మార్ట్ ఫోన్ను ఉపయోగించి దొంగలకు చుక్కలు చూపించాడు. సమయస్ఫూర్తితో మెలిగి పోలీసులకు సమాచారం అందించి దోపిడీ దొంగల ఆట కట్టించాడు. ఈ ఘటన కర్ణాటక రాజధాని బెంగళూరులో జరిగింది.
అజయ్ బాలగోపాల్ అనే వ్యక్తి.. కుమారులు రాహుల్, సమీర్తో కలిసి రఘువనహళ్లి సమీపంలోని నారాయణనగర్ 1 బ్లాక్, విశ్రాంతి లేఅవుట్లో నివసిస్తున్నారు. 27 ఏళ్ల రాహుల్ ఓ ఆటోమోటివ్స్ సంస్థలో మేనేజర్గా విధులు నిర్వర్తిస్తున్నాడు. రోజులాగే బుధవారం ఉదయాన్నే లేచి నీళ్లు తాగేందుకు వెళ్లగా.. వంటింట్లో ఏదో అలజడి వినిపించింది. "మా నాన్న లేదా సోదరుడు ఉన్నారు అనుకున్నాను. కానీ కొద్దిసేపయ్యాక వారు కాదని అర్థమైంది. వెంటనే నా ఫోన్ సహాయంతో ఇంట్లోని సీసీటీవీ కెమెరాల లైవ్ ఫుటేజీ చూశాను. ఫర్నీచర్ వెనక ఇద్దరు వ్యక్తులు దాక్కున్నారని గమనించాను." అని రాహుల్ వివరించాడు.
ఇంట్లోకి దొంగలు ప్రవేశించారని గుర్తించిన రాహుల్.. మెల్లగా పైకెళ్లి తండ్రిని లేపాడు. ఇంట్లో ఉన్న లైసెన్స్డ్ డబుల్ బ్యారెల్ తుపాకీ తీసుకుని కిందకు వచ్చాడు. మరోసారి సీసీటీవీ కెమెరాల ఫుటేజీ చూడగా.. కిచెన్లో మరో ఐదుగురు దొంగలు దాక్కున్నారని గమనించాడు. దొంగల చేతుల్లో పదునైన ఆయుధాలు, రాడ్లు, పైపులు ఉన్నాయని.. తాము వస్తే దాడి చేసేందుకే వారు ఎదురుచూస్తున్నారని రాహుల్కు అర్థమైంది. వెంటనే అప్రమత్తమై పక్కింటి వాచ్మన్ సాయంతో పోలీసులకు సమాచారం అందించాడు. తుపాకీతో కిందకు వచ్చిన రాహుల్, అతడి తండ్రి.. ఫర్నీచర్ వెనుక దాక్కున్న ఇద్దరికి గురిపెట్టి, వారిని బంధించారు. కేవలం 12 నిమిషాల్లోనే పోలీసులు ఘటనా స్థలానికి చేరుకున్నారు. దుండగుల చేతిలో ఆయుధాలను గమనించిన పోలీసులు.. లోపలకు వెళ్లకుండా ఆగారు. దొంగలు పారిపోకుండా ఇంటి బయటే తలుపుల వద్ద కాపు కాశారు. స్టేషన్కు ఫోన్ చేసి అదనపు బలగాలను పంపించాలని కోరారు.
మేడపై ఉన్న ఇద్దరు దొంగలు.. పోలీసుల కదలికలను గమనించారు. అక్కడి నుంచి దూకి పరారయ్యారు. వెంటనే స్మార్ట్ ఫోన్లోని యాప్ ఉపయోగించి ఇంట్లో ఉన్న లైట్లన్నీ ఆన్ చేశాడు రాహుల్. దీంతో తాము దొరికిపోయామని అర్థం చేసుకున్న దొంగలు ఇంట్లోనే దాక్కున్నారు. ఘటనా స్థలానికి చేరుకున్న పోలీసు బృందం గంటకుపైగా శ్రమించి ఐదుగురు దొంగలను బంధించింది. మేడపై నుంచి దూకి పారిపోయిన మరో ఇద్దరిని 9 గంటల్లోనే అనేకల్ బస్టాండ్లో పట్టుకున్నారు. ఘటనా స్థలంలో ఆయుధాలతో పాటు కారంపొడి ప్యాకెట్లు, తాళ్లు లభ్యమయ్యాయి.
నిందితులంతా 2018లో ముంబయిలో ఓ బార్లో పనిచేసేవారని పోలీసులు గుర్తించారు. కొవిడ్ లాక్డౌన్ సమయంలో ఉద్యోగాలు కోల్పోయి బెంగళూరుకు తిరిగి వచ్చారని డీసీపీ పీ.కృష్ణకాంత్ తెలిపారు. నిందితులను బిహార్కు చెందిన మహ్మద్ నియాజ్, ఉత్తర్ ప్రదేశ్కు చెందిన మహ్మద్ ఇమ్రాన్, సైయ్యద్ ఫైజల్ అలీ, రాజస్థాన్కు చెందిన రామ్ బిలాస్, మధ్యప్రదేశ్కు చెందిన సునీల్ దాంగి, ఒడిశాకు చెందిన రజత్ మాలిక్గా గుర్తించారు. రాహుల్ కుటుంబం ఎలక్ట్రానికి సిటీలో ఓ సంస్థను నిర్వహిస్తోందని.. వారు ఖరీదైన కార్లలో తిరగడం చూసిన నిందితులు వారింట్లో చోరీ చేసేందుకు ప్లాన్ చేశారని డీసీపీ చెప్పారు.
ఇవీ చదవండి: కాంగ్రెస్ ఎంపీ మృతికి మోదీ సంతాపం.. భారత్ జోడో యాత్ర వాయిదా
'అలా చేయకపోతే ఆయన్ను చంపేస్తాం!'.. నితిన్ గడ్కరీ ఆఫీస్కు బెదిరింపు కాల్స్
