అయోధ్య రామాలయం కోసం మౌనవ్రతం- పదేళ్ల వయసులో ప్రతిజ్ఞ- ప్రాణప్రతిష్ఠ రోజు విరమణ!

Ayodhya Ram Mandir Pran Pratishtha : అయోధ్యలో రామమందిర నిర్మాణం కోసం అనేక సంవత్సరాలుగా మౌనవ్రతం చేస్తున్నాడు ఓ వృద్ధుడు. దీంతోపాటు కాలికి చెప్పులు సైతం వేసుకోకుండానే తిరుగుతున్నాడు. జనవరి 22న ఆలయ ప్రారంభోత్సవం రోజున మళ్లీ మాట్లాడి మౌనవ్రతాన్ని వీడాలని సంకల్పించుకున్నాడు.

Ayodhya Ram Mandir Pran Pratishtha : అయోధ్యలో రామమందిరం నిర్మించే వరకు మౌనవ్రతం చేస్తానని 10 ఏళ్ల వయసులో ప్రతిజ్ఞ చేశాడు ఓ వ్యక్తి. దీంతో పాటు గుడిలో రామ్​లల్లాను ప్రతిష్ఠించేవరకు కాలికి చెప్పులు సైతం వేసుకోబోనని ప్రతినబూనాడు. దీంతో అప్పటి నుంచి అతడిని మోని బాబాగా పిలుస్తున్నారు. ఎన్నో ఏళ్ల తర్వాత కోరిక ఫలించడం వల్ల జనవరి 22న శ్రీరాముడి నామాన్ని స్మరించుకోని మౌనవ్రతాన్ని వీడాలని అనుకుంటున్నాడు.

మధ్యప్రదేశ్​ దతియా జిల్లాలోని సూర్య నగర్​కు చెందిన మోహన్ గోపాల్ దాస్​ అనే వ్యక్తికి చిన్ననాటి నుంచి శ్రీరాముడంటే విపరీతమైన భక్తి. రాముడి జన్మస్థలమైన అయోధ్యలో దేవాలయం లేకపోవడం వల్ల కలత చెందాడు. ఈ క్రమంలోనే పదేళ్ల వయసులోనే రామ మందిరాన్ని నిర్మించేంతవరకు తాను మౌనవ్రతం చేస్తానని, కాలికి చెప్పులు సైతం వేసుకోనని ప్రతిజ్ఞ చేశాడు. ఆ తర్వాత 1992లో బాబ్రీ మసీదు కూల్చివేతకు కరసేవకులతో అయోధ్య సైతం వెళ్లాడు.

మోహన్ గోపాల్ దాస్​

అయితే, ఎన్నో ఏళ్ల తర్వాత కోర్టు తీర్పుతో అయోధ్యలో రామమందిరం నిర్మాణం కావడం పట్ల సంతోషం వ్యక్తం చేస్తున్నాడు గోపాల్ దాస్. జనవరి 22న జరిగే రాముడి ప్రాణప్రతిష్ఠకు మోదీ తనకు ఆహ్వానం పంపిస్తారని ధీమా వ్యక్తం చేస్తున్నాడు. ఇందుకోసం ఎస్​పీ కార్యాలయానికి వెళ్లి దరఖాస్తు చేసుకున్నారు. ఆహ్వానం వస్తుందేమోనన్న ఆశతో రోజూ కార్యాలయాలు చుట్టూ తిరిగి వస్తున్నాడు. ఎవరైనా ప్రశ్నిస్తే, పలకపై రాసి సమాధానం ఇస్తున్నాడు.

పలకపై రాసి చూపిస్తున్న మోహన్​

మోదీ చేతుల మీదుగా ప్రతిష్ఠాపన
అయోధ్యలో రాముడి విగ్రహ ప్రతిష్ఠాపన ప్రధానమంత్రి నరేంద్ర మోదీ చేతుల మీదుగా జరగనుంది. జనవరి 22న మధ్యాహ్నం 12.20 గంటలకు ఈ కార్యక్రమం నిర్వహించనున్నారు. జనవరి 16 నుంచి వైదిక కార్యక్రమాలు ప్రారంభిస్తారు. యూపీ గవర్నర్ ఆనందీ బెన్ పటేల్, ఆ రాష్ట్ర సీఎం యోగి ఆదిత్యనాథ్, ఆర్ఎస్ఎస్ సర్​సంఘ్ చాలక్ మోహన్ భాగవత్ ఈ కార్యక్రమానికి హాజరు కానున్నారు. ఈ వేడుకకు వేల మంది సాధువులు విచ్చేస్తారని నిర్వాహకులు తెలిపారు. అయోధ్యలో ప్రాణప్రతిష్ఠ నేపథ్యంలో దేశవ్యాప్తంగా ఉన్న ఆలయాల్లోనూ వివిధ కార్యక్రమాలు నిర్వహించనున్నారు.

మరోవైపు, రాముడి ప్రతిష్ఠాపన ప్రకటన చేసిన తర్వాత అయోధ్య గురించి భారీగా సెర్చ్ చేస్తున్నారు. ట్రావెల్​ బుకింగ్​ ప్లాట్​ఫామ్​ల్లో భారత్​తో పాటు అమెరికా, గల్ఫ్ దేశాల నుంచి బుకింగ్ చేసుకుంటున్నారు. భారత్​లో అయోధ్య కోసం సుమారు 1,806 శాతం సెర్చింగ్​ పెరిగినట్లు ప్రముఖ ట్రావెల్ బుకింగ్ సంస్థ మేక్​ మై ట్రిప్​ తెలిపింది. ఎయిర్​పోర్ట్ ప్రారంభించిన డిసెంబర్​ 30 తేదీన భారీ స్థాయిలో సెర్చ్ చేశారని సంస్థ ప్రతినిధి తెలిపారు.