Atal Tunnel Record: ప్రపంచంలోనే అత్యంత పొడవైన హైవే టన్నెల్గా అటల్ సొరంగం(10 వేల అడుగుల ఎత్తులో) గుర్తింపు పొందింది. ఈ మేరకు వరల్డ్ బుక్ ఆఫ్ రికార్డ్స్ ధ్రువీకరించిందని రక్షణ మంత్రిత్వ శాఖ తెలిపింది. బోర్డర్ రోడ్స్ ఆర్గనైజేషన్ (డీజీబీఆర్) డైరెక్టర్ జనరల్ లెఫ్టినెంట్ జనరల్ రాజీవ్ చౌధరి ఈ మేరకు అవార్డును అందుకున్నారు. లేహ్-స్పితి లోయను కలుపుతూ అటల్ టన్నెల్ను డీజీబీఆర్ ఆధ్వర్యంలో నిర్మించారు.
అక్టోబర్ 3న ఉదయం 10గంటలకు ప్రధాని చేతుల మీదుగా ఈ అత్యాధునిక సొరంగం ప్రారంభోత్సవం కోసం హిమాచల్‌ ప్రదేశ్‌లోని రోహ్‌తంగ్‌ సిద్ధంగా ఉంది. అనేక వ్యూహాత్మక ప్రయోజనాలున్న ఈ సొరంగంతో మనాలి- లేహ్ మధ్య దూరం 46 కిలోమీటర్లు తగ్గిపోతుంది. అంతేకాదు దాదాపు 4- 5 గంటల ప్రయాణ సమయం ఆదా అవుతుంది. క్లిష్టమైన ప్రయాణాన్ని సురక్షితం చేస్తుంది. 9.02 కిలోమీటర్ల ఈ సొరంగ మార్గానికి మాజీ ప్రధాని అటల్ బిహారీ వాజ్‌పేయీ పేరు పెట్టారు. అన్నిరకాల వాతావరణ పరిస్థితుల్ని తట్టుకొనేలా, 80 కిలోమీటర్ల వేగంతో వాహనాలు ప్రయాణించేలా అత్యాధునిక సాంకేతికతతో ఈ సొరంగాన్ని నిర్మించారు.
ఏడాది పొడవునా అన్ని వాతావరణ పరిస్థితులు తట్టుకుని దీటుగా నిలబడే ఈ సొరంగ మార్గం.. మనాలిని లేహ్లోని లాహౌల్-స్పితి లోయతో అనుసంధానం చేస్తుంది. గతంలో భారీమంచుతో ఈ లోయకు 6 నెలల పాటు రాకపోకలు నిలిచిపోయేవి.
ఈ టన్నెల్ నిర్మాణంలో అత్యాధునిక సాంకేతికత వినియోగించారు. హిమాలయాల్లోని పీర్ పంజాల్ పర్వతశ్రేణిలో 3వేల మీటర్లు.. అంటే సముద్ర మట్టానికి 10వేల అడుగుల ఎత్తులో ఈ టన్నెల్ నెలవై ఉంది. ఈ సొరంగ మార్గం దక్షిణ ద్వారం.. మనాలికి 25 కిలో మీటర్ల దూరంలో ఉండగా.. ఉత్తర ద్వారం.. లాహౌల్ లోయలోని తెలింగ్ గ్రామం వద్ద ఉంది.
ఇదీ చదవండి: 'ఐదు రాష్ట్రాల్లో మాదే విజయం.. ఎక్కడ చూసినా ప్రభుత్వ సానుకూలతే!"
