అసోం శాసనసభ ఎన్నికల మూడో దశ పోలింగ్కు సర్వం సిద్ధమైంది. మంగళవారం 40 స్థానాలకు ఓటింగ్ జరగనుంది. ఆయా నియోజకవర్గాల నుంచి మొత్తం 337 మంది అభ్యర్థులు బరిలో ఉన్నారు. 54-పశ్చిమ గువాహటి నియోజకవర్గంలో అత్యధికంగా 15 మంది అభ్యర్థులు పోటీ చేస్తుండగా... 48-బోకో ఎస్సీ నియోజకవర్గం నుంచి కనిష్ఠంగా ముగ్గురు బరిలో నిలిచారు.
అసోం మూడో దశ
- శాసన సభ స్థానాలు: 40
- మొత్తం అభ్యర్థులు: 337
- ఓటర్లు: 79,19,641
- పురుషులు: 40,11,539
- మహిళలు: 39,07,963
- ఇతరులు: 139
- మొత్తం జిల్లాలు: 11
- పోలింగ్ కేంద్రాలు: 11,401
కరోనా వైరస్ వ్యాప్తి నేపథ్యంలో పోలింగ్ కేంద్రాల వద్ద తగిన జాగ్రత్తలు ఉండేలా ఎన్నికల సంఘం చర్యలు చేపడుతోంది. కొవిడ్ బాధితులకు, దివ్యాంగులకు, 80 ఏళ్ల దాటిన వృద్ధులకు ఎన్నికల సంఘం పోస్టల్ బ్యాలెట్ పద్ధతిని అందుబాటులో ఉంచింది.
మరోసారి అసోంలో ప్రభుత్వం స్థాపించాలని భాజపా పట్టుదలతో ఉంది. కమళదళాన్ని గద్దె దించి అధికారం చేపట్టాలని కాంగ్రెస్ ఊవిళ్లూరుతోంది. ఇందుకోసం కాంగ్రెస్ మహాజోత్ పేరుతో కూటమి ఏర్పాటు చేసింది. ఇందులో ఏఐయూడీఎఫ్, సీపీఐ, సీపీఎం, సీపీఐ (మార్క్సిస్ట్-లెనినిస్ట్), ఏజీఎం, బీపీఎఫ్ పార్టీలు ఉన్నాయి.
భాజపా ఏజీపీ, యూపీపీఎల్ పార్టీలతో కలిసి పోటీ చేసింది.
మూడో దశ కీలక అభ్యర్థులు
- ప్రమీళా రాణి బ్రహ్మ (బీపీఎఫ్) - కోక్రాఝార్
- హిమంత బిశ్వ శర్మ (భాజపా) - జలుక్బారీ
- రంజిత్ కుమార్ దాస్ (భాజపా) - పటచర్కుర్చి
- రైకిబుద్దీన్ అహ్మద్ (కాంగ్రెస్) - చేయ్గావ్
- ఫణి భూషణ్ చౌదరి (ఏజీపీ) - బొంగాయ్గావ్
ఇదీ చదవండి : అవినీతి కేసులో యడియూరప్పకు ఊరట
