దిగ్గజ వ్యాపారవేత్త ముకేశ్ అంబానీ నివాసం వద్ద పేలుడు పదార్థాల కేసు, మన్సుఖ్ హిరేన్ మృతి కేసుల్లో ఎన్ఐఏ దర్యాప్తు కార్ల చుట్టూ తిరుగుతోంది. ముంబయిలోని అంబానీ నివాసం వద్ద కలకలం రేపిన స్కార్పియోతో మొదలు ఇటీవల ఔట్ల్యాండర్ వరకు ఈ కేసులో ఇప్పటివరకు 7 కార్లు స్వాధీనం చేసుకుంది జాతీయ దర్యాప్తు సంస్థ. వీటిలో కొన్ని వాహనాలకు ముంబయి నగర పోలీస్ కమిషనరేట్తో సంబంధం ఉన్నట్లు తేలగా... మున్ముందు ఈ దర్యాప్తు ఎలా సాగుతుందోనని సర్వత్రా ఆసక్తి నెలకొంది.
సీజ్ చేసిన కార్లలో మెర్సిడిస్, వోల్వో వంటి విలావంతమైన కార్లు ఉండటం గమనార్హం. వీటిని మాజీ పోలీస్ అధికారి, ప్రస్తుతం ఈ కేసుల్లో ఆరోపణలు ఎదుర్కొంటున్న సచిన్ వాజే ఉపయోగించారని తొలుత దర్యాప్తు చేపట్టిన యాంటీ టెర్రరిజం స్క్వాడ్ వెల్లడించింది. ఇన్నోవా, స్కార్పియో, 1 మెర్సిడిస్, ప్రాడో సహా ఔట్ ల్యాండర్ కార్లనూ వాజే వాడారని తెలిసింది.
వాజే కార్లు..
వాజే ఉయోగించిన కార్లలో ఎన్ఐఏ మొదట స్వాధీనం చేసుకున్నది ఇన్నోవా. ఘటన జరిగిన రోజు ఆ ప్రాంతంలో వాజే ఈ కారులో అంబానీ నివాసం మీదుగా ప్రయాణించినట్లు అధికారులు గుర్తించారు. ఈ కారు క్రైం ఇంటెలిజెన్స్ యూనిట్ చెందినదని దర్యాప్తులో తెలిసింది.
అంబానీ నివాసం వద్ద కలకలం రేపిన స్కార్పియో కూడా నాలుగు రోజుల ముందు పోలీస్ కమిషనర్ కార్యాలయం వెలుపల పార్క్ చేసి ఉందని దర్యాప్తులో వెల్లడైంది.
వాజేకు చెందిన మరో కారు మెర్సిడిస్. ఈ కారులోనే వాజే.. స్కార్పియో కారు యజమాని అయిన మన్సుఖ్ హిరేన్తో ఫిబ్రవరి 17న భేటీ అయ్యారని తేలింది. భేటీ తర్వాత స్కార్పియో కారు తాళాలు తీసుకుని ఈ కారులోనే కార్యాలయానికి వచ్చారని దర్యాప్తులో తెలిసింది. ఈ కారును వాజే తరచూ కమిషనర్ కార్యాలయానికి తీసుకువచ్చేవారని సమాచారం.
ఎన్ఐఏ సీజ్ చేసిన మరో కారు ప్రాడో కూడా వాజేకు చెందినదే. వాంగ్మూలం నమోదు చేయడం కోసం మన్సుఖ్ను వాజే ఈ కారులోనే పోలీస్ కమిషనరేట్కు తీసుకువచ్చారని దర్యాప్తులో వెల్లడైంది.
ఇటీవల సీజ్ చేసిన ఔట్ల్యాండర్ కారుకు సంబంధించి ప్రకాశ్ హోవల్ అనే వ్యక్తిని అదుపులోకి తీసుకుని ఎన్ఐఏ విచారిస్తోంది.
ఇప్పటివరకు ఎన్ఐఏ 2 మెర్సిడిస్, 1 ఇన్నోవా, 1 ప్రాడో, 1 వోల్వో, 1 ఔట్ ల్యాండర్ కార్లను ఎన్ఐఏ స్వాధీనం చేసుకుంది.
ఇదీ చదవండి : 'ఆ పేలుడు పదార్థాలు కొన్నది సచిన్ వాజేనే'
