సరిహద్దు ఉద్రిక్తతలు కొనసాగుతున్న వేళ చైనాకు వణుకు పుట్టించేలా క్షిపణి పరీక్షలు చేపడుతోంది భారత్. తాజాగా శత్రు దేశాల యుద్ధ విమానాలను కూల్చే సామర్థ్యం గల 10 దేశీయ ఆకాశ్ వాయు రక్షణ క్షిపణులను పరీక్షించింది భారత వాయుసేన. గత వారం ఆంధ్రప్రదేశ్లోని సూర్యలంక ఫైరింగ్ రేంజ్ నుంచి వీటిని విజయవంతంగా పరీక్షించారు. దాదాపు అన్ని క్షిపణులు లక్ష్యాన్ని కచ్చితత్వంతో ఛేదించినట్లు అధికారులు తెలిపారు.
" విభిన్న పరిస్థితుల్లో శత్రుమూకల విమానాలను కూల్చేందుకు కంబైన్డ్ గైడెడ్ వెపన్స్ ఫైరింగ్-2020లో భాగంగా 10 ఆకాశ్ మిసైల్స్ను వాయుసేన పరీక్షించింది. వాటితో పాటు ఇగ్లా షోల్డర్-ఫైర్డ్ వాయు రక్షణ క్షిపణులనూ పరీక్షించారు. తూర్పు లాద్దాఖ్తో పాటు ఇతర సెక్టార్లలో ఈ రెండు వ్యవస్థలను మోహరించారు. "
- అధికార వర్గాలు
అత్యంత విజయవంతమైన దేశీయ ఆయుధాలలో ఆకాశ్ ఒకటిగా తెలిపారు అధికారులు. దేశీయ ఆయుధాలతో యుద్ధాలు చేయాలనే రక్షణ దళాల ఆకాంక్షను ఇవి నెరవేరుస్తాయని ఆశాభావం వ్యక్తం చేశారు.
ఈ క్షిపణులను ఇటీవలే ఆధునికీకరించింది రక్షణ పరిశోధన, అభివృద్ధి సంస్థ (డీఆర్డీఓ). గతంలో కంటే అత్యంత కచ్చితత్వంతో లక్ష్యాలను ఛేదించే వ్యవస్థలను ఇందులో పొందుపరిచారు. అత్యంత ఎత్తులోనూ లక్ష్యాలను ఛేదించే సామర్థ్యం గల ఆకాశ్ ప్రైమ్ మిసైల్స్పై డీఆర్డీఓ పనిచేస్తోంది. భారత సరిహద్దుల్లో చైనా మోహరించిన ఐదోతరం జే-20 ఫైటర్స్ను సైతం కూల్చేందుకు వాటిలో మార్పులు చేస్తోంది.
ఇదీ చూడండి: నౌకా విధ్వంసక క్షిపణి పరీక్ష విజయవంతం
