Alwar Girl Case: రాజస్థాన్ అల్వర్లో 14 ఏళ్ల దివ్యాంగ బాలికపై సామూహిక అత్యాచారం కేసుపై రాజస్థాన్ ప్రభుత్వం కీలక నిర్ణయం తీసుకుంది. ఈ కేసును కేంద్ర దర్యాప్తు సంస్థకు(సీబీఐ) అప్పగించాలని తీర్మానించింది. ముఖ్యమంత్రి అశోక్ గహ్లోత్ అధ్యక్షతన ఆదివారం జరిగిన క్షేత్రస్థాయి సమావేశం అనంతరం ఈ నిర్ణయం తీసుకున్నట్లు అధికారులు తెలిపారు.
అయితే.. దివ్యాంగ బాలికపై సామూహిక అత్యాచారం జరగలేదని ఇటీవల పోలీసులు స్పష్టం చేశారు. ఐదుగురు డాక్టర్ల బృందం జైపుర్లోని జేకే లోన్ ఆస్పత్రిలో వైద్య పరీక్షలు నిర్వహించి ఈ విషయాన్ని నిర్ధరించినట్లు చెప్పారు. అయితే బాలిక ప్రైవేటు భాగాలపై తీవ్ర గాయాలున్నాయని, వాటికి కారణాలు ఇంకా తెలియాల్సి ఉందన్నారు.
తదుపరి విచారణలో ఆ విషయం తెలిసే అవకాశముందని పేర్కొన్నారు. అంతేగాక బాలిక తనంతట తానే గ్రామం నుంచి పట్టణానికి వెళ్లిందని విచారణలో తెలిసిందని పోలీసులు వెల్లడించారు.
తీవ్ర దుమారం..
జనవరి 12 మంగళవారం అర్ధరాత్రి అల్వర్ తిజారా ఫాటక్ సమీపంలోని ఓ వంతెన వద్ద తీవ్ర గాయాలతో అపస్మారక స్థితిలో పడి ఉన్న దివ్యాంగురాలిని స్థానికులు గుర్తించారు. ఆమె పరిస్థితి చూసి సామూహిక అత్యాచారం జరిగి ఉండవచ్చని పోలీసులు మొదట అనుమానించారు. బాలిక ప్రైవేటు భాగాలపై గాయాలు ఉండటం కూడా ఇందుకు బలం చేకూర్చింది. వెంటనే ఆమెను ఆస్పత్రికి తరలించి చికిత్స అందించారు. ఈ విషయంపై రాజకీయంగా కూడా దుమారం చెలరేగింది. అత్యాచారానికి పాల్పడ్డ నిందితులను కఠినంగా శిక్షించాలని డిమాండ్లు వెల్లువెత్తాయి.
ఇదీ చూడండి: కూతురిని కొట్టి చంపిన తల్లిదండ్రులకు జీవిత ఖైదు
