అందమైన మంచు పర్వతాలపై నడుస్తున్న ఈ అమ్మాయి పేరు.. నమ్రత నందీష్. బెంగళూరుకు చెందిన ఈమె ఐటీ కంపెనీలో హెచ్ఆర్ మేనేజర్‌. కళాశాల వయసు నుంచే ఈమెకు ట్రెక్కింగ్ అంటే చాలా ఇష్టం. ఉద్యోగ జీవితం మొదలవడం.. ఇంటి బాధ్యతలతో కూడిన గజిబిజి జీవితం ఆమె అభిరుచులకు, ఇష్టాలకు బ్రేక్ వేసింది. అయితే, మహమ్మారి కారణంగా వర్క్ ఫ్రమ్ హోం సౌకర్యం.. ఆ సమయాన్ని పాత ఇష్టాల వైపు మళ్లించింది.
పక్కాగా ప్లాన్ అంటూ లేదు. శ్రీనగర్‌ను సందర్శించాలనే ఆలోచనతో ఇదంతా ప్రారంభమైంది. గడ్డకట్టిన దాల్ సరస్సును చూడాలనుకుని బయలుదేరింది. అలా.. జనవరి 26న కశ్మీర్ లోయకు జర్నీ ప్రారంభించింది నమ్రత.
ట్రెక్కింగ్ కోసం కశ్మీర్‌కు వెళ్లి.. దక్షిణ కశ్మీర్, పహల్గామ్ ప్రాంతంలోని పీర్ పంజాల్, జంస్కార్ పర్వత శ్రేణుల మధ్య ఉన్న తులియన్ సరస్సుతో ప్రారంభించింది నమ్రత. అనంతనాగ్- కిష్త్‌వర్ ప్రాంతంలోని శిల్సార్ సరస్సు వరకు 4 నెలల్లో 50 సరస్సులను చుట్టేసింది. ఈ ఘనత సాధించిన తొలి మహిళగా చరిత్ర సృష్టించిందీ యువతి.
సముద్ర మట్టానికి 10 వేల అడుగులో ఎత్తులో ఉండే ఈ సరస్సులను ఆల్పైన్ సరస్సులు అంటారు. వీటిని ట్రెక్కింగ్ చేయడం ద్వారా ట్రెక్కింగ్ కమ్యూనిటీ నమ్రతకు ఆల్పైన్ గర్ల్‌గా కితాబునిచ్చింది.
ఆర్థటైటిస్ ఉన్నా..
ట్రెక్కింగ్ మీద ఇష్టంతో ఎంతోమంది పర్యటకులు ఇక్కడకు వస్తుంటారు. 3-4 రోజుల సుదీర్ఘ ట్రెక్ చేయాలని కోరుకుంటారు. అయితే నమ్రత మాత్రం వారికి భిన్నం. తను నిర్దేశించుకున్న లక్ష్యం కోసం కష్టపడింది. ఆర్థరైటిస్ సమస్యతో బాధపడుతున్నా ప్రయాణం పూర్తి చేసి.. డేరింగ్‌ లేడీగా తోటి పర్వతారోహకుల మనన్నలు పొందింది.
ఆల్పైన్ గర్ల్ ఆఫ్ ఇండియాగా సోషల్‌ మీడియాలో మంచి గుర్తింపు తెచ్చుకుంది నమ్రత. ఈమె ప్రయాణం గురించి తెలుసుకున్న నెటిజన్లు.. బహుశా దేశంలో మరెవరూ లాక్‌డౌన్‌ను ఈ విధంగా ఉపయోగించుకోలేదేమో అని కామెంట్లు చేస్తున్నారు. ఎక్కడ.. బెంగళూరు.. ఇంకెక్కడ శ్రీనగర్‌.. ఇష్టమైన పని కష్టంగా ఉన్నప్పటికీ మనసు పెట్టి చేస్తే విజయతీరాలకు చేరవచ్చని నిరూపిస్తోంది.. ది ఆల్పైన్ గర్ల్ నమ్రత నందీష్.
ఇవీ చూడండి: 'భారత్లో డెల్టా ఉద్ధృతే ఎక్కువ.. మిగిలినవి తక్కువే'
