ప్రియురాలిని పెళ్లికి ఒప్పించేందుకు అశోక్(25) అనే యువకుడు హంగామా సృష్టించాడు. ఎత్తైన విద్యుత్తు టవర్పైకి ఎక్కి దిగనని మొండికేశాడు. ఝార్ఖండ్ రాంచీలోని తాట్కుండో గ్రామంలో ఈ ఘటన జరిగింది.
నిజానికి అశోక్ను పెళ్లిచేసుకోనని ఇదివరకే ఆ యువతి తేల్చిచెప్పింది. దీంతో తీవ్ర మనోవేదనకు గురైన అశోక్.. ఓసారి బలవన్మరణానికి ప్రయత్నించాడు. రైల్వే ట్రాక్పై పడుకొని మృతి చెందాలని భావించాడు. అది విఫలం కావడం వల్ల గ్రామానికి సమీపంలోని వంద అడుగులు ఎత్తైన విద్యుత్తు టవర్పైకి ఎక్కాడు. ఆ సమయంలో విద్యుత్తు సరఫరా నిలిచిపోవడం వల్ల ఎలాంటి ప్రమాదం సంభవించలేదు.
సమాచారం అందుకున్న వెంటనే ఘటనా స్థలానికి చేరుకున్నారు పోలీసులు. కిందకు దిగిరావాలని లౌడ్ స్పీకర్ల ద్వారా అశోక్కు సూచించారు. ఎంతకీ దిగకపోవడం వల్ల.. గ్రామస్థుల సహాయంతో యువకుడు ప్రేమించిన అమ్మాయిని పిలిపించారు. యువతి పెళ్లికి ఒప్పుకున్న తర్వాత కిందకు దిగొచ్చాడు. యువకుడిని అతని కుటుంబ సభ్యులకు అప్పగించారు పోలీసులు.
షోలేను గుర్తుచేశాడు..
ఈ ఘటన ప్రముఖ హిందీ చిత్రం 'షోలే'ను గుర్తుకు తెచ్చిందని స్థానిక పోలీస్ స్టేషన్ ఇంఛార్జి రాణా జంగ్ బహదుర్ సింగ్ అన్నారు. చుట్టుపక్కల ప్రాంతాల్లో ఇది చర్చనీయాంశంగా మారిందని చెప్పారు.
ఇదీ చదవండి: మట్టిలో కూరుకుపోయి ముగ్గురు చిన్నారులు మృతి
