గోవా వైద్య కళాశాల ఆసుపత్రి(జీఎంసీహెచ్)లో ఆక్సిజన్ అందక ప్రాణాలు కోల్పోతున్న వారి సంఖ్య అంతకంతకూ పెరుగుతోంది. ప్రాణవాయువు కొరతతో అక్కడ శుక్రవారం వేకువ జామున మరో 13 మంది మరణించారు. దీంతో గత నాలుగు రోజుల్లేనే ఆక్సిజన్ లేక మొత్తం 75 మంది కరోనా రోగులు చనిపోయారు.
ఈ ఆస్పత్రిలో కరోనా రోగుల మరణాలకు సంబంధించి బొంబాయి హైకోర్టులో విచారణ జరుగుతున్న సమయంలోనే పదుల సంఖ్యలో ప్రాణనష్టం జరగడం ఆందోళన కలిగిస్తోంది. జీఎంసీహెచ్లో రోగుల మృతికి గల కారణాన్ని గోవా ప్రభుత్వం వెల్లడించలేదు. అయితే మెడికల్ ఆక్సిజన్ను రోగులకు సరఫరా చేసే విషయంలో లాజిస్టిక్ సమస్యలు ఉన్నాయని ప్రభుత్వం గురువారం కోర్టుకు తెలిపింది.
జఎంసీహెచ్ ఆస్పత్రిలో ఆక్సిజన్ సమస్య కారణంగా మంగళవారం 26 మంది, బుధవారం 21 మంది, గురువారం 15 మంది, శుక్రవారం 13మంది కరోనా రోగులు చనిపోయారు.
ఆక్సిజన్ ట్రాలీలను తీసుకొచ్చే ట్రాక్టర్ల లాజిస్టిక్ సమస్యలు, ఆస్పత్రిలోని ఆక్సిజన్ సిలిండర్లను అనుసంధానించే క్రమంలో సమస్యల కారణంగా రోగులు చనిపోయారని గురువారం గోవా ప్రభుత్వం తరఫు న్యాయవాది కోర్టుకు తెలిపారు.
విపక్షాల మండిపాటు
గోవా ఆసుపత్రుల్లో ఆక్సిజన్ కొరతపై విపక్షాలు మండిపడుతున్నాయి. ముఖ్యమంత్రి ప్రమోద్ సావంత్పై తీవ్రస్థాయిలో విమర్శలు చేస్తున్నాయి.
378 మంది..
గోవాలో ఆసుపత్రుల్లో ఆక్సిజన్ కొరత కారణంగా ఏప్రిల్ 30- మే 11 మధ్య 378మంది మరణించినట్టు ప్రభుత్వం హైకోర్టుకు గురువారం వెల్లడించింది.
