ఒడిశాలోని కలహండి జిల్లా కర్లాపాత్ అభయారణ్యంలో ఏనుగుల అనుమానాస్పద మృతి జంతు ప్రేమికుల్లో ఆందోళన కలిగిస్తోంది. గత 14 రోజుల్లో 6 గజరాజులు మృతిచెందాయి. ఇందులో 5 ఆడ ఏనుగులు, ఓ గున్న ఏనుగు ఉన్నాయి. మరణానికి కారణం పశువుల్లో వ్యాపించే హేమోర్హేజ్ సెప్టీస్కేమియా అనే వ్యాధి అని అధికారులు భావిస్తున్నారు. ఓ ఏనుగుకు జరిపిన పోస్ట్మార్టం రిపోర్ట్ మృతికి కారణం ఈ వ్యాధే అని సూచిస్తోందని పేర్కొన్నారు. పశువుల్లో వ్యాపించే ఈ వ్యాధి ఏనుగులకు సోకడం ఇదే తొలిసారని అభిప్రాయపడ్డారు. చుట్టుపక్కల గ్రామాల్లోని పశువుల్లో ఈ వ్యాధిని గుర్తించలేదని, ఇటీవల వ్యాక్సినేషన్ కూడా జరిపామని స్పష్టం చేశారు. అయితే ప్రస్తుత పరిస్థితుల దృష్ట్యా పశువులకు మరోసారి వ్యాక్సిన్ వేయిస్తామని తెలిపారు.
ప్రజల అనుమానాలు?
వరుసగా ఏనుగులు మృతి చెందడంపై స్థానికులు అనుమానాలు వ్యక్తం చేస్తున్నారు. వన్య ప్రాణుల కోసం నిర్మించిన ఉప్పునీటి కొలనుల్లో వేటగాళ్లు విషం కలిపి ఉండొచ్చని భావిస్తున్నారు. లేదా హేమోర్హేజ్ సెప్టీస్కేమియా జబ్బు సోకిన పశువుల కారణంగా ఈ కొలను నీరు కలుషితమై ఉండొచ్చని అభిప్రాయపడ్డారు. మొదట అభయారణ్యంలో అనేక చోట్ల సీసీటీవీ కెమేరాలు ఏర్పాటు చేశారని, కానీ అకారణంగా వాటిని తొలగించారని తెలిపారు. దీనిపై సమగ్ర దర్యాప్తు చేపట్టాలని డిమాండ్ చేస్తున్నారు స్థానికులు.
ఇదీ చదవండి : 108 ఆలయాలతో 'గుప్తకాశీ'గా మలూటీ
