ఓ వైపు దేశంలో కరోనా ఉద్ధృతి పెరిగిపోతున్నా.. మరోవైపు కొవిడ్‌ వ్యాక్సినేషన్ ప్రక్రియ శరవేగంగా ముందుకెళ్తోంది. దీంతో వ్యాక్సిన్ పంపిణీలో భారత్‌ ప్రపంచదేశాలకు ఆదర్శంగా నిలుస్తోంది. శుక్రవారం రాత్రి నాటికి దేశ వ్యాప్తంగా పంపిణీ చేసిన టీకా డోసుల సంఖ్య 2,80,08,817కు చేరింది.
కేంద్ర వైద్య శాఖ విడుదల చేసిన గణాంకాల ప్రకారం.. శుక్రవారం ఒక్కరోజే(రాత్రి 8 వరకు) 18.40 లక్షల మందికి వ్యాక్సిన్ అందించారు. ఇందులో 14.64 లక్షల మందికి తొలి డోసు, 3.76 లక్షల మందికి రెండో డోసు ఇచ్చారు. తొలి డోసు తీసుకున్నవారిలో 60 ఏళ్ల పైబడినవారు 11.08 లక్షల మంది ఉండగా.. వైద్య సమస్యలు ఉన్న 45-60 ఏళ్ల వ్యక్తులు 2 లక్షల మంది ఉన్నారు.
ఇప్పటివరకు 72.84 లక్షల మంది వైద్య సిబ్బందికి, 72.15 లక్షల ఫ్రంట్లైన్ వర్కర్లకు కరోనా టీకా తొలి డోసు అందింది. 41.76 లక్షల మంది వైద్య సిబ్బంది, 9.28 లక్షల మంది ఫ్రంట్లైన్ కార్మికులు రెండో డోసు అందుకున్నారు.
ఇదీ చదవండి: ముంబయిలో 90శాతం కేసులు ఆ ప్రాంతాల్లోనే!
