తమిళనాడు కోయంబత్తూర్లో దారుణం జరిగింది. ప్లస్ టూ చదివే 17 ఏళ్ల విద్యార్థిని ఇంట్లోనే ఆత్మహత్య (Student Suicide) చేసుకుంది. బాలిక మరణానికి స్కూల్లో పని చేసే ఓ ఉపాధ్యాయుడు లైంగికంగా వేధించడమే కారణం అని తల్లిదండ్రులు ఆరోపించారు. టీచర్ పదేపదే వేధింపులకు గురి చేయడం వల్ల బాలిక బలవన్మరణానికి పాల్పడినట్లు సన్నిహిత వర్గాలు తెలిపాయి. ఇదే విషయం పోలీసులు స్వాధీనం చేసుకున్న సూసైడ్ నోట్లో కూడా ఉందని పేర్కొన్నాయి.
టీచర్ వేధిస్తున్న విషయం తమ కూతురు చెప్పకుండా పాఠశాలను మార్చమని అడిగినట్లు తల్లిదండ్రులు తెలిపారు. బాలిక కోరిక మేరకు ఈ సెప్టెంబర్లో వేరే పాఠశాలలో చేర్చినట్లు చెప్పారు. అయినప్పటికీ.. ఆ ఉపాధ్యాయుడు అసభ్యకరమైన మెసేజ్లు చేసే వాడని బాలిక స్నేహితురాలు ఒకరు తెలిపారు.
విద్యార్థిని ఆత్మహత్యపై తల్లిదండ్రులు కలెక్టర్ కార్యాలయం ఎదుట ఆందోళనకు దిగారు. తమకు న్యాయం చేయాలని కోరారు. దీనిపై పోలీసులు పోక్సో చట్టం ప్రకారం కేసు నమోదు చేశారు.
ఇదీ చూడండి: నిధి కోసం పూజలు.. మహిళను వివస్త్రను చేసి..
