బంగాల్లోని నదియా జిల్లా హన్స్ఖలీ ప్రాంతంలో ఘోర రోడ్డు ప్రమాదం జరిగింది. ఈ దుర్ఘటనలో 18 మంది ప్రాణాలు కోల్పోగా, ఐదుగురు తీవ్రంగా గాయపడ్డారు. వ్యాన్, ట్రక్కు ఢీకొనడం వల్లే ఈ ప్రమాదం జరిగినట్టు అధికారులు వెల్లడించారు.
అంత్యక్రియలకు వెళ్తూ..
మృతిచెందిన ఓ మహిళకు అంత్యక్రియలు నిర్వహించేందుకు ఆమె మృతదేహంతో సహా వ్యాన్లో బయలుదేరారు కుటుంబ సభ్యులు. ఈ క్రమంలో ఆగిఉన్న ఓ ట్రక్కును వ్యాన్ ఢీకొంది. దట్టమైన పొగమంచు ఉండటం సహా అతివేగం ప్రమాదానికి దారి తీసి ఉండొచ్చని అధికారులు భావిస్తున్నారు. శనివారం అర్ధరాత్రి 12 గంటలకు ఫుల్బరీ హైవేపై జరిగిన ఈ ఘటనపై కేసు నమోదు చేసిన పోలీసులు దర్యాప్తు చేస్తున్నారు.
గవర్నర్ సంతాపం..
నదియా జిల్లాలో జరిగిన రోడ్డు ప్రమాదంపై గవర్నర్ జగదీప్ ధన్కర్ దిగ్భ్రాంతి వ్యక్తం చేశారు. మృతుల కుటుంబాలకు సంతాపం తెలిపారు.
ఇదీ చూడండి : mohan bhagwat news: 'దేశ విభజనకు ముఖ్య కారణం అదే'
