పార్ట్​టైమ్ జాబ్​ పేరుతో మోసాలు- 100కు పైగా వెబ్​సైట్లను బ్లాక్​ చేసిన కేంద్రం

100 Websites Blocked In India : టాస్క్​ ఆధారిత పార్ట్‌టైమ్​ జాబ్​ మోసాలతో పాటు వ్యవస్థీకృత అక్రమ పెట్టుబడులను ప్రోత్సహిస్తున్న 100కి పైగా అనధికారిక వెబ్​సైట్లను బ్లాక్ చేసింది కేంద్ర ప్రభుత్వం. కేంద్ర హోం మంత్రిత్వ శాఖ సిఫార్సు మేరకు ఈ నిర్ణయం తీసుకుంది.

100 Websites Blocked In India : కేంద్ర హోం మంత్రిత్వ శాఖ సిఫార్సు మేరకు వ్యవస్థీకృత అక్రమ పెట్టుబడులను ప్రోత్సహిస్తున్న 100కి పైగా అనధికారిక వెబ్​సైట్లను బ్లాక్ చేసింది కేంద్ర ప్రభుత్వం. ఇందులో టాస్క్​​ ఆధారిత పార్ట్‌టైమ్​ జాబ్​ మోసాలకు పాల్పడుతున్న వెబ్​సైట్లు కూడా ఉన్నాయి. కాగా, ఈ వెబ్​సైట్లను విదేశాలకు చెందినవారు నిర్వహిస్తున్నట్లు కేంద్రం ఓ ప్రకటనలో తెలిపింది.

కేంద్ర హోం మంత్రిత్వ శాఖకు చెందిన ఇండియన్ సైబర్ క్రైమ్ కోఆర్డినేషన్ సెంటర్​ తన వర్టికల్​ నేషనల్​ సైబర్​ క్రైమ్​ థ్రెట్​ అనలిటిక్స్​ యూనిట్​ (ఎన్​సీటీఏయూ) ద్వారా వ్యవస్థీకృత పెట్టుబడులతో పాటు టాస్క్​ ఆధారిత పార్ట్ టైమ్ జాబ్ మోసాలకు పాల్పడుతున్న 100కిపైగా వెబ్‌సైట్‌లను గతవారం గుర్తించింది. ఈ మేరకు వాటిని బ్లాక్ చేయాలని హోం శాఖకు సిఫార్సు చేసింది. ఐటీ చట్టం-2000 ప్రకారం సదరు వెబ్​సైట్లను బ్లాక్ చేసినట్లు ఎలక్ట్రానిక్స్ అండ్ ఇన్ఫర్మేషన్ టెక్నాలజీ మంత్రిత్వ శాఖ ఒక ప్రకటనలో తెలిపింది.

ఆర్థిక నేరాలకు సంబంధించిన వ్యవస్థీకృత అక్రమ పెట్టుబడులను ఈ వెబ్​సైట్లు సులభతరం చేస్తున్నాయని.. వీటిని విదేశాల్లో ఉండి నిర్వహిస్తున్నారని కేంద్రం తెలిపింది. ఇందుకోసం వీరు డిజిటల్ ప్రకటనలు, చాట్ మెసెంజర్‌లు, అద్దె ఖాతాల వంటి వాటిని ఉపయోగిస్తున్నారని ఐటీ శాఖ గుర్తించింది. కార్డ్​ నెట్‌వర్క్, క్రిప్టో కరెన్సీ, విదేశీ ఏటీఎం ఉపసంహరణలు, అంతర్జాతీయ ఫిన్‌టెక్ కంపెనీల సాయంతో పెద్ద ఎత్తున ఆర్థిక మోసాలకు పాల్పడి వాటి ద్వారా వచ్చిన ఆదాయాన్ని భారతదేశం నుంచి మనీ లాండరింగ్​ చేస్తున్నట్లు కేంద్ర హోం శాఖ తన ప్రకటనలో స్పష్టం చేసింది.

"ఆన్​లైన్​ మోసాలకు పాల్పడుతున్న ఈ వెబ్​సైట్లపై 1930 హెల్ప్‌లైన్ ద్వారా మాకు అనేక ఫిర్యాదులు అందాయి. వీటితో పౌరులకు పెద్ద ప్రమాదం పొంచి ఉందని అర్థమయింది. అలాగే యూజర్​ డేటా భద్రతకు సంబంధించిన చాలా సమస్యలను మేము కనుగొన్నాము."
- హోం మంత్రిత్వ శాఖ

వారే లక్ష్యంగా..
ఈ రకమైన మోసాలు సాధారణంగా, గూగుల్​, మెటాకు చెందిన ప్లాట్​ఫామ్​లలో వర్క్ ఫ్రమ్​ హోమ్​ జాబ్స్​, ఇంట్లోనే ఉండి సంపాదించడం ఎలా అంటూ మోసం చేస్తున్నారని కేంద్ర హోం శాఖ చెప్పింది. విదేశాలకు చెందిన వైబ్​సైట్​ నిర్వాహకులు వీటిని ఇతర భాషల్లోకి కూడా మార్చి టార్గెటెడ్​ డిజిటల్​ ప్లాట్​ఫామ్​ల ద్వారా ప్రకటనలు ఇస్తున్నారని తెలిపింది. ముఖ్యంగా రిటైర్డ్​ ప్రభుత్వ ఉద్యోగులు, మహిళలు, నిరుద్యోగ యువతే లక్ష్యంగా సైబర్​ కేటుగాళ్లు ఈ మోసాలకు పాల్డడుతున్నారని హోం శాఖ అధికారులు పేర్కొన్నారు.