Yarlagadda Venkatrao Met Chandrababu: గుడివాడ నుంచైనా పోటీకి సిద్ధం.. చంద్రబాబుతో భేటీ అనంతరం యార్లగడ్డ వెంకట్రావు

Yarlagadda Venkatrao Met Chandrababu: ఎన్నికలకు ముందే రాష్ట్రంలో రాజకీయాలు కాక మీదున్నాయి. ఎన్టీఆర్​ జిల్లా గన్నవరం నియోజకవర్గం మరి కాస్తా హీట్​ఎక్కింది. 2019 ఎన్నికల్లో టీడీపీ తరఫున గెలిచిన వల్లభనేని వంశీ.. వైసీపీలోకి చేరగా.. అదే ఎన్నికల్లో వైసీపీ నుంచి పోటీచేసిన యార్లగడ్డ వెంకట్రావు సైకిల్​ ఎక్కేందుకు సిద్ధమయ్యారు. ఈరోజు హైదరాబాద్​లో తెలుగుదేశం అధినేత చంద్రబాబుని ఆయన నివాసంలో కలిసిన యార్లగడ్డ.. టీడీపీలోకి చేరేందుకు తన సమ్మతిని తెలిపారు. మరోవైపు ఈ రాత్రికి నారా లోకేశ్​ యువగళం పాదయాత్ర గన్నవరం నియోజకవర్గంలోకి ప్రవేశించనుంది. నేటి నుంచి మొత్తం 4 రోజులపాటు గన్నవరం నియోజకవర్గంలోనే యువగళం పాదయాత్ర సాగనుంది. వరుస విజయాలతో గన్నవరం పీఠం ఎప్పటికీ తెలుగుదేశం పార్టీదే అని చాటేలా ఎల్లుండి లక్షలాది మందితో గన్నవరంలో యువగళం భారీ బహిరంగ సభ నిర్వహించనున్నారు. రేపటి నుంచి లోకేశ్​ యువగళం పాదయాత్రలో యార్లగడ్డ వెంకట్రావు పాల్గొననున్నారు. కాగా గన్నవరంలో జరిగే భారీ బహిరంగ సభలో నారా లోకేశ్​ సమక్షంలో టీడీపీ కండువా కప్పుకోనున్నారని సమాచారం. 

తెలుగుదేశం అధినేత చంద్రబాబు దార్శనికుడని ఆయనతో పని చేయాలనే భేషరతుగా ఆ పార్టీలో చేరనున్నట్లు.. గన్నవరం నేత యార్లగడ్డ వెంకట్రావు తెలిపారు. వైకాపాలో తనకు ఎదురైన పరిస్థితులను చంద్రబాబుకు వివరించారు. త్వరలోనే తెలుగుదేశంలో చేరనున్నట్లు.. సమావేశం తర్వాత ప్రకటించారు. పార్టీ చెబితే గుడివాడ నుంచైనా పోటీ చేసేందుకు సిద్ధంగా ఉన్నట్లు యార్లగడ్డ వెల్లడించారు.