Murder Mystery దొంగతనం చూసిందని హత్య చేశారు.. మూడేళ్ల తరువాత మిస్టరీని ఇలా ఛేదించారు..!

Three Year Old Murder Mystery : వాళ్లు చేయి తిరిగిన దొంగల ముఠా.. రాత్రి పూట ఇళ్లు తాళం వేసి కనపడితే చాలు ఇట్టే ఇంటిని ఖాళీ చేస్తారు. ఈ దొంగలు మన రాష్ట్రంలోనే కాకుండా పలు రాష్ట్రాల్లో దొంగతనాలు చేసి పోలీసు రికార్డుల్లో పేర్లు నమోదు చేసుకున్నారు. సాఫిగా సాగిపోతున్న వారి అక్రమాలను ఓ మహిళా చూసింది. అంతే వారి గుట్టు బయటపుడుతుందని భావించిన దొంగలు ఆమెను అడ్డుతప్పించాలని నిర్ణయించుకున్నారు. ఆలోచన వచ్చిందే తడవుగా.. ఆమెను అతి కిరాతకంగా అంతమొందించారు. ఈ హత్య మూడేళ్ల క్రితం స్థానికంగా తీవ్ర సంచలనం సృష్టించింది. అయితే, హత్య మిస్టరీ పోలీసులకు సవాలుగా మారింది. హత్య చేసిన ఆ దుండగులు మాత్రం 'దృశ్యం' సినిమాలో హీరో మాదిరిగా తప్పించుకున్నారు. ఈ కేసును సవాలుగా భావించిన పోలీసులు ఎట్టకేలకు ఛేదించారు. 

మూడేళ్ళక్రితం తాము చేసిన దొంగతనం చూసిందన్న కారణంతో ఒక మహిళను అత్యంత దారుణంగా హత్య చేసిన దుండగులను అనంతపురం పోలీసులు పట్టుకున్నారు. స్థానికంగా నాడు తీవ్ర సంచలనం సృష్టించిన ఈ కేసును వన్ టౌన్, సీసీఎస్ పోలీసులు చేధించారు. వివరాల్లోకి వెళ్తే..   అనంతపురం నగరంలోని టీవీ సమీపంలో ఉన్న శివ సాయి నగర్​లో కొత్తగా నిర్మిస్తున్న ఒక ఇంటి వద్ద నిద్రిస్తున్న కుమ్మర లక్ష్మీదేవి అనే మహిళను గుర్తు తెలియని వ్యక్తులు దారుణంగా హత్య చేశారు. అదే రోజు ఈ సంఘటన జరిగిన పక్కింట్లో దొంగతనం కూడా జరిగింది. 

ఈ రెండు చేసింది ఒకరేనని పోలీసులు నిర్ధారించుకున్నారు. అయితే మూడేళ్ల వరకు నిందితులు తప్పించుకుని తిరిగారు. చివరకు వన్ టౌన్ పోలీసులుతో పాటు సీసీఎస్ పోలీసులు సంయుక్తంగా ఈ ముఠాను పట్టుకున్నారు. ఈ రెండు ఘటనలకు పాల్పడింది అంతరాష్ట్ర దొంగల ముఠాగా పోలీసులు తేల్చారు. అనంతపురం, గుంతకల్లు ప్రాంతాలకు చెందిన షికారి సర్దార్, షికారి బూజులు, షికారి మద్దిలేటి ఈ హత్య చేసినట్టు ఒప్పుకున్నారు. ఆ రోజు రాత్రి దొంగతనం చేసి వస్తుండగా.. లక్ష్మీదేవి అరవడంతో ఈ ఘటనకు పాల్పపడినట్టు చెప్పారని పోలీసులు తెలిపారు. వీరి వద్ద నుంచి 33 గ్రాముల బంగారం, హత్యకు ఉపయోగించిన ఆయుధాన్ని స్వాధీనం చేసుకున్నారు. వీరు ఇంకా పలు కేసుల్లో నిందితులుగా ఉన్నట్టు అనంతపురం డీఎస్పీ ప్రసాద్ రెడ్డి తెలిపారు.