No Warden in Govada BC Hostel: గోవాడ బీసీ హాస్టల్​లో రాత్రివేళ కనిపించని సిబ్బంది.. జనసైనికుల అగ్రహం

No Warden in Govada BC Hostel: అనకాపల్లి జిల్లా చోడవరం మండలంలోని గోవాడ బీసీ బాలుర హాస్టల్​లో సిబ్బంది లేకపోవటం అక్కడకు పరిశీలనకు వెళ్లిన జనసేన పార్టీ నాయకులను విస్తుపోయేలా చేసింది. అభం శుభం తెలియని చిన్న పిల్లలు ఉండే హాస్టల్​లో.. వార్డెన్​తో పాటు ఏ కిందిస్ధాయి సిబ్బంది కూడా విధుల్లో లేకపోవడం వారిని ఆశ్చర్యపరిచింది. అసలేం జరిగిందంటే.. చోడవరం నియోజకవర్గంలోని కొన్ని హాస్టళ్లను జనసేన పార్టీకి చెందిన కొందరు నాయకులు క్షేత్ర స్థాయిలో పరిశీలించి.. అక్కడ ఉన్న వారి సమస్యలు తెలుసుకుంటున్నారు.

ఈ క్రమంలో గోవాడ బీసీ హాస్టల్​కు వెళ్లిన వారికి అక్కడ సిబ్బంది కనిపించకపోవడంతో ఆశ్చర్యానికి గురయ్యారు. దీనిపై హాస్టల్​లో ఉండే పిల్లలను ఆరా తీశారు. హాస్టల్​లో ఇద్దరు సిబ్బంది ఉంటారని.. వార్డెన్ ప్రతి నెలా జరిగే ఉన్నతాధికారుల మీటింగ్​కు జిల్లా కేంద్రానికి వెళ్లాడని పిల్లలు తెలిపారు. ఇంకో వ్యక్తి ఇతర కారణాలతో బయటకు వెళ్లాడని పేర్కొన్నారు. మరి వాచ్​మెన్ ఎక్కడ అని జనసేన నాయకులు ప్రశ్నించగా.. తమ హాస్టల్​కు వార్డెన్​ ఎవరూ లేరని పిల్లలు తెలిపారు. సిబ్బంది లేకపోవడంతో ఆడుకుంటునో.. మరే ఇతర కారణంతోనో హాస్టల్​ పక్కనే ఉన్న పెద్ద కాల్వ వైపో, ఎదురుగా ఉన్న ప్రధాన రహదారి మీదికో పిల్లలు వెళ్తే పరిస్థితి ఏంటని జనసేన నాయకులు ఆవేదన వ్యక్తం చేశారు.​ సిబ్బంది బాధ్యతారాహిత్యంపై ఉన్నతాధికారులు సత్వరమే చర్యలు తీసుకోవాలని.. హాస్టల్​కు వాచ్​మెన్​ను నియమించాలని వారు డిమాండ్ చేశారు.