ఉత్సాహంగా సాగుతున్న ‘యువగళం’ పాదయాత్ర - భారీ సంఖ్యలో తరలివచ్చిన జనం

Lokesh Yuvagalam Padayatra in Kakinada District : కాకినాడ జిల్లాలో యువగళం పాదయాత్ర.. ఉత్సాహంగా కొనసాగుతోంది. జిల్లాలోని ముమ్మిడివరం నియోజకవర్గం పరిధిలోని తాళ్లరేవు మండలంలో ఈ ఉదయం (గురువారం).. పాదయాత్ర ప్రారంభమైంది. సుంకరపాలెంలో బసచేసిన ప్రాంతం నుంచి బయలుదేరిన లోకేశ్‌ మార్గమధ్యలో స్థానిక రవి డిగ్రీ కాలేజీ విద్యార్థులతో మాట్లాడారు. ప్రతి ఒక్కరిని పలకరిస్తూ యోగక్షేమాలు అడిగి తెలుసుకున్నారు. వారితో సెల్ఫీలు దిగారు. మల్లవరం సెంటర్లో మహిళలతో సమావేశమై లోకేశ్​.. "బాబు ష్యూరిటీ.. భవిష్యత్తు గ్యారంటీ " కార్యక్రమాల వివరాలు తెలిపారు. లోకేశ్​ వెంట తెలుగుదేశం పార్టీ ఉపాధ్యక్షుడు బుచ్చిబాబు, యువజన సంఘం అధ్యక్షుడు ధూళిపూడి బాబి, మహిళా కార్యకర్తలు.. అలాగే పెద్ద ఎత్తున స్థానికులు పాదయాత్రలో పాల్గొన్నారు.  

అయితే తాత్కాలిక విరామ అనంతరం లోకేశ్​ పాదయాత్రను సోమవారం నుంచి తిరిగి ప్రారంభించిన విషయం తెలిసినదే. ప్రజలు భారీ సంఖ్యలో తరలివచ్చి లోకేశ్​కు సంఘీభావం ప్రకటించారు. చిన్న, పెద్ద, ముసలి ముతక అనే తేడా లేకుండా అందరూ పాదయాత్రలో ఉత్సాహంగా లోకేశ్ వెంట నడిచారు. వారి కష్టాలను నేరుగా అడిగి తెలుసుకున్న లోకేశ్.. టీడీపీ అధికారంలోకి వచ్చిన వెంటనే వారి సమస్యలను పరిష్కరిస్తానని హామీ ఇచ్చారు.