Fake Medicines in Vijayawada: విజయవాడలో నకిలీ మందుల రాకెట్.. తనిఖీల్లో భారీగా వెలుగులోకి

Fake medicines in Vijayawada: బెజవాడలో భారీగా నకిలీ మందులు బయటపడ్డాయి. వన్ టౌన్, గొల్లపూడిలోని హోల్ సేల్ మందుల దుకాణాల్లో డ్రగ్ కంట్రోల్ అధికారులు తనిఖీలు చేపట్టారు. వాసవి ఫార్మా కాంప్లెక్స్​లో జరిపిన తనిఖీల్లో లక్షల రూపాయల విలువ చేసే నకిలీ మందులను అధికారులు స్వాధీనం చేసుకున్నారు. ఈ ఘటన ఆలస్యంగా వెలుగులోకి వచ్చింది. బ్రాండెడ్ పేరుతో నకిలీ మందులను విక్రయిస్తున్నట్లు అధికారులు గుర్తించారు. హైదరాబాద్ నుంచి ఈ ఔషధాలను తక్కువ ధరకు కొనుగోలు చేసి అమ్మకాలు జరుపుతున్నట్లు తేల్చారు. హోల్ సేల్ వ్యాపారులు (Wholesalers) బిల్స్ లేకుండా మందులు కొనుగోలు చేస్తున్నారు. 

ఈ ఔషధాలను విజయవాడ నుంచి రాష్ట్రంలోని పలు ప్రాంతాల్లోకి దుకాణాలకు విక్రయించినట్లు డ్రగ్ కంట్రోల్ అధికారులు గుర్తించారు. వీటిలో గుండె సంబంధిత వ్యాధులకు వినియోగించే ఔషధాలు సైతం ఉన్నాయని సమాచారం. ఔషధాల శాంపిల్స్ (Drug samples)ను పరీక్షల నిమిత్తం అధికారులు ల్యాబ్​కు పంపగా.. ఫలితాలు ఇంకా రావాల్సి ఉంది. ఫలితాల ఆధారంగా బాధ్యులపై పూర్తి స్థాయి చర్యలు చేపడతామని అధికారులు చెబుతున్నారు. ఇటీవల తెలంగాణాలో భారీగా నకిలీ మందుల రాకెట్ (Counterfeit drugs racket) బయటపడింది. ఈ సమాచారంతో అధికారులు రాష్ట్రంలో కర్నూలు, నెల్లూరు, గుంటూరు ఇలా పలు జిల్లాల్లో తనిఖీలు చేపట్టారు. డ్రగ్ కంట్రోల్ అధికారులు ఫిర్యాదు మేరకు భవానీపురం పోలీసులు ఇద్దరిపై కేసు నమోదు చేశారు.