చాలా మంది గంటల కొద్దీ సమయాన్ని ఫోన్లోనే గడిపేస్తున్నారు. ఇలాంటి జీవన శైలి వల్ల కొత్త కొత్త జబ్బుల బారిన పడుతున్నారు. ఫోన్ను అతిగా వాడటం వల్ల వస్తున్న సమస్యల్లో నిద్రలేమి ప్రధానం. అర్ధరాత్రి వరకు ఫోన్నే చూస్తూ కూర్చుంటే నిద్ర ఎలా పడుతుంది చెప్పండి! కాబట్టి సాధ్యమైనంతగా మొబైల్ వాడకాన్ని తగ్గించాలని నిపుణులు సూచిస్తున్నారు. ముఖ్యంగా నిద్రపోయే ముందు ఫోన్ చూడటం ఆపేయాలని అంటున్నారు. దీనికి వారు ఇస్తున్న సూచనలు ఏంటో తెలుసుకుందాం..
బెడ్పై ఫోన్ వద్దు
నిద్రపోయే ముందు ఫోన్ను చూడటం మంచి అలవాటు కాదని వైద్యులు అంటున్నారు. నిద్ర పట్టేందుకు సహకరించే మెలటోనిన్ ఉత్పత్తిని ఫోన్ తగ్గిస్తుందట. రాత్రిపూట ఫోన్ వాడితే అందులోని బ్లూ లైట్ మన శరీరంలోని మెలటోనిన్ ఉత్పత్తిని క్రమంగా తగ్గిస్తుందని నిపుణులు చెబుతున్నారు. దీని వల్ల సరిగ్గా నిద్రపట్టదట. అలాగే అంతర్జాలంలో అనంతమైన కంటెంట్ అందుబాటులో ఉన్నందున ఒక్కసారి ఫోన్ పట్టుకుంటే.. అంత సులువుగా దాన్ని పక్కనపెట్టలేని పరిస్థితి ఏర్పడుతుంది. కాబట్టి బెడ్ మీదకు వచ్చాక ఫోన్ను పక్కనపెట్టేయడం అలవాటు చేసుకోండి. అలాగే ఛార్జర్లను కూడా వేరే గదిలో పెట్టడం మంచిది.
బెడ్ టైం మోడ్ను సెట్ చేసుకోండి
నిద్రను మెరుగుపర్చుకోవాలంటే రోజూ ఒకే సమయానికి పడుకోవడం అలవాటు చేసుకోవాలి. రోజూ ఒకే సమయానికి నిద్రపోయి.. ఒకే సమయానికి మేల్కోవడం అలవాటు చేసుకుంటే తక్కువ వ్యవధిలో మంచి ఫలితాలు వస్తాయి. వారాంతంలో కూడా దీన్ని పక్కాగా పాటించాలి. ఏ పని లేదు కదా అని శని, ఆదివారాల్లో ఆలస్యంగా నిద్రపోవడం లాంటివి చేయకూడదని నిపుణులు సూచిస్తున్నారు. అందుకోసం ఫోన్లో స్లీప్ ఫోకస్ను సెట్ చేసుకుంటే సరిపోతుంది. ఐఫోన్లలో స్లీప్ ఫోకస్ను సెట్ చేసుకోవాలి. అదే ఆండ్రాయిడ్ యూజర్లు అయితే బెడ్ టైం మోడ్ను యాక్టివేట్ చేసుకుంటే సరిపోతుంది.
డార్క్ మోడ్ను యాక్టివేట్ చేసుకోండి
రాత్రిపూట ఫోన్ వాడటం వల్ల కళ్లపై తీవ్ర ప్రభావం పడుతుంది. కాబట్టి రాత్రిళ్లు ఫోన్లోని బ్లూ లైట్ ఫిల్టర్ను ఆన్ చేసుకోవాలి. అదే ఐఫోన్ వాడేవారైతే నైట్ షిఫ్ట్ను యాక్టివేట్ చేసుకోవాలి.
స్లీప్ యాప్స్ను వాడండి
రోజూ ఎన్ని గంటలు నిద్రపోతున్నారో తెలుసుకునేందకు స్లీప్ యాప్స్ను వాడండి. అందుకోసం థర్డ్ పార్టీ యాప్స్ల మీద ఆధారపడకుండా అందుబాటులో ఉన్న మెరుగైన యాప్లను ఇన్స్టాల్ చేసుకుంటే మంచిది. ఇన్సైట్ టైమర్ లాంటి యాప్ను ఇన్స్టాల్ చేసుకుంటే శ్రావ్యమైన సంగీతాన్ని వింటూ హాయిగా నిద్రపోవచ్చు. కథలు వింటూ నిద్రపోవాలని ఉంటే.. అయితే బెడ్ టైం టేల్స్ అనే యాప్ను డౌన్లోడ్ చేసుకుంటే సరిపోతుంది. ఇంట్లో బామ్మలాగే ఎన్నో కథలను చెబుతూ మనల్ని నిద్రపోయేలా చేస్తుందీ యాప్.
ఈ-మెయిల్స్ చెక్ చేయొద్దు
రాత్రిళ్లు నిద్రపోయే ముందు ఫోన్లో ఈ-మెయిల్స్ చెక్ చేసుకోవడం లాంటివి చేయొద్దని నిపుణులు సూచిస్తున్నారు. దీని వల్ల తర్వాతి రోజు ఆఫీసులో చేయబోయే పనుల గురించి ఆలోచిస్తూ ఒత్తిడికి గురయ్యే ప్రమాదం ఉందని వారు హెచ్చరిస్తున్నారు. అందుకు ఓ పరిష్కారాన్ని సూచిస్తున్నారు. బెడ్ పైకి రావడానికి ముందే ఆఫీసు పనులను పూర్తి చేయాలని చెబుతున్నారు.
పుస్తకాలు చదవడం అలవాటు చేస్కోండి
కొంతమంది రాత్రిళ్లు ఫోన్ను కాసేపు చూస్తే కానీ నిద్ర పట్టదని అంటుంటారు. దీని బదులు కొత్త అలవాట్లను చేసుకుంటే ఉత్తమమని నిపుణులు అంటున్నారు. నిద్రపోయే ముందు పుస్తకాలు చదవడం లేదా రాయడం అలవర్చుకోవాలి. అలాగే ధ్యానం కూడా సాధన చేస్తూ ఉండాలి. దీని వల్ల రాత్రిపూట త్వరగా నిద్రపట్టడమే కాకుండా ఉదయం సరికొత్త శక్తితో నిద్ర లేస్తామని నిపుణులు చెబుతున్నారు.
అలారం వాడొచ్చు
నిద్రను మెరుగుపరుచుకోవడానికి సంబంధించి అలారం క్లాక్ వాడితే మంచి ఫలితాలు ఉంటాయని నిపుణులు అంటున్నారు. రాత్రిపూట నిద్రపోయే ముందు, ఉదయం లేచే సమయం ఇలా ప్రతిదీ అలారంలో సెట్ చేసుకుంటే సరిపోతుంది. అదే మిమ్మల్ని సరైన సమయానికి నిద్రపోయేలా చేస్తుంది, అలాగే మేల్కొనేలా చేస్తుందని నిపుణుల సూచిస్తున్నారు.
ఇవీ చదవండి : గురక పెడుతున్నారా? ఇలా చేస్తే ఉపశమనం!
సడెన్గా మైకం కమ్మినట్లు అనిపిస్తుందా..? దేనికి సంకేతమో తెలుసా?
