కొండాపురం మండలం పి అనంతపురం గ్రామంలో మొత్తం 677 మంది నిర్వాసిత కుటుంబాలకు పరిహారం మంజూరు అయింది. ఈ ఏడాది జూలై 24వ తేదీన ఒక్కో పి.డి.ఎఫ్ కు 10 లక్షలు చొప్పున మొత్తం 67.7 కోట్ల రూపాయలు మంజూరు చేస్తూ రాష్ట్ర ప్రభుత్వం ఉత్తర్వులు జారీ చేసింది. గ్రామంలో మొత్తం 265 మంది అనర్హులకు అక్రమంగా పరిహారం మంజూరు చేశారని జిల్లా అధికార యంత్రాంగానికి ఫిర్యాదులు వెల్లువెత్తాయి. ఈ ఫిర్యాదు చేసింది రామసుబ్బారెడ్డి వర్గీయుడు అయిన గురు ప్రతాప్ రెడ్డి అని.. సుధీర్ రెడ్డి వర్గం అతనిపై కోపంగా ఉంది. ఈ నెల 13వ తేదీన ప్రత్యేక ఉప కలెక్టర్ రోహిణి తహసీల్దార్లతో గ్రామానికి వెళ్లి వివరాలు ఆరా తీస్తున్నారు.
అదే సమయంలో వైకాపాకు చెందిన ఇరువర్గాలు అక్కడికి చేరుకొని మాటమాట పెంచుకున్నారు. అప్పటికే తెచ్చుకున్న కత్తులు , ఇతర మారణాయుధాలతో గురు ప్రతాపరెడ్డిపై దాడి చేసి హత్యచేశారు. ఆ సమయంలో కేవలం ముగ్గురు పోలీసులు మాత్రమే ఉన్నారని రామసుబ్బారెడ్డి వర్గం ప్రజా ప్రతినిధుల సమక్షంలో వాపోయారు
శనివారం వైకాపా నాయకులు రామసుబ్బారెడ్డి , జిల్లా వైకాపా అధ్యక్షుడు సురేష్ బాబు.. కొండాపురం మండలం పి.అనంతపురం గ్రామానికి చేరుకుని ప్రతాపరెడ్డి కుటుంబసభ్యులను పరామర్శించారు. ఈ సందర్భంగా నేతలు మాట్లాడుతూ.. నిందితులు ఎంతటి వారైనా సరే కఠినంగా శిక్షపడేలా చేస్తామన్నారు. ముఖ్యమంత్రి వైఎస్ జగన్మోహన్ రెడ్డి దృష్టికి తీసుకెళ్లి అనర్హుల పేర్లు తీసివేసి అర్హులకు ముంపు చెక్కులను అందేలా జాగ్రత్త తీసుకుంటామని హామీ ఇచ్చారు. గ్రామంలో పోలీస్ పికెట్ ఏర్పాటు చేసి నిందితులను గాలిస్తున్నట్లు డీఎస్పీ నాగరాజు తెలిపారు .
గురు ప్రతాప్ రెడ్డి పై ఎమ్మెల్యే సుధీర్ రెడ్డి వర్గం భూమి తగాదాల్లో ఏడాది క్రితం దాడి చేసి తీవ్రంగా గాయపరిచారు. ఇతని ప్రాణాలకు ముప్పు ఉందని తెలిసిన పోలీసులు అజాగ్రత్తగా ఉన్నారని స్థానికులు, కుటుంబ సభ్యులు వాపోతున్నారు.
ఇదీ చదవండి: జవాన్లతో కలిసి మోదీ దీపావళి వేడుకలు
