వాగులో పడి ఇద్దరు బాలురు గల్లంతు

ఆడుకోవడానికి వెళ్లిన ఇద్దరు బాలురు ప్రమాదవశాత్తూ వాగులో పడి గల్లంతయ్యారు. ఈ ఘటన కడపలో జరిగింది. వారి జాడ కోసం అధికారులు గాలిస్తున్నారు.

కడపలో ప్రవహిస్తున్న బుగ్గవంక వాగులో పడి ఆదివారం ఇద్దరు చిన్నారులు గల్లంతయ్యారు. వారి కోసం పోలీసులు, స్థానికులు గాలింపు చర్యలు చేపట్టారు. ఇటీవల కురిసిన వర్షాలకు చింతకొమ్మదిన్నె మండలంలోని బుగ్గవంక ప్రాజెక్టు నిండటంతో అధికారులు 4 గేట్లు ఎత్తి నీటిని దిగువకు విడుదల చేస్తున్నారు.

ఫలితంగా.. కడప నగరం నడిబొడ్డున ఉన్న బుగ్గవంక వాగుకు వరద పోటెత్తింది. ఈ క్రమంలో ఆదివారం సాయంత్రం ఇద్దరు బాలురు ప్రమాదవశాత్తు వాగులో పడి గల్లంతయ్యారు. వీరిలో ఒకరి వయసు 10, మరొకరి వయసు 12 గా స్థానికులు చెప్పారు. చీకటి పడగా గాలింపు చర్యలకు ఆటంకం ఏర్పడింది. పూర్తి వివరాలు తెలియాల్సి ఉంది.