వైఎస్ వివేకానంద రెడ్డి హత్య కేసు దర్యాప్తు ను సీబీఐ వేగవంతం చేసి విచారణ ముమ్మరం చేయటంతో ప్రతిపక్షం తెదేపా వైకాపా పై విమర్శనాస్త్రాలు ఎక్కుపెట్టింది. హత్య జరిగినప్పుడు అధికారంలో ఉన్న తెదేపా నేతలపైనా, నాటి ముఖ్యమంత్రి చంద్రబాబు పైనా నెపం నెట్టిన వారు, అధికారంలోకి వచ్చాక నాటి ఆరోపణలు ఎందుకు రుజువు చేయలేకపోయారని నిలదీస్తున్నారు. ముఖ్యమంత్రి జగన్ రెడ్డి బంధువుల్ని సీబీఐ విచారణకు పిలుస్తుండటంతో హత్యతో ఆ కుటుంబానికే సంబంధం ఉందని తెలుగుదేశం నేతలు ఆరోపిస్తున్నారు.
కోట్ల కోసం సొంత బాబాయిపై గొడ్డలి: లోకేశ్
తన చేతికంటిన నెత్తురుని జగన్ రెడ్డి చంద్రబాబుకు పూశారని పార్టీ జాతీయ ప్రధాన కార్యదర్శి నారా లోకేశ్ ధ్వజమెత్తారు. కోట్ల కోసం సొంత బాబాయిపై గొడ్డలి వేటు వేశారని ఆరోపించారు. ఓట్ల కోసం ‘నారాసుర రక్త చరిత్ర’ అంటూ.. సొంత పత్రికలో ఆదే గొడ్డలిని గ్రాపిక్స్‌లో చంద్రబాబు చేతిలో పెట్టి మరీ అచ్చేయించారని ఆగ్రహం వ్యక్తం చేశారు. జగన్ తరతరాల వైఎస్సాసుర రక్త చరిత్ర అంతా నేరాలమయం అని మరోసారి సీబీఐ దర్యాప్తుతో తేటతెల్లమైందని దుయ్యబట్టారు. ఫ్యాక్షన్‌ జగన్ రెడ్డి బ్లడ్‌ గ్రూప్‌ అన్న లోకేశ్.. అరాచకాలకు వైఎస్ కుటుంబం చిరునామా అని ఆక్షేపించారు. దాడులు, దౌర్జన్యాలు, కబ్జాలపై వైఎస్ కుటుంబానికి పేటెంట్‌ హక్కులున్నాయని మండిపడ్డారు. అదే కుటుంబానికి చెందిన వివేకా హత్యే వైఎస్ వంశ చరిత్రకి తాజా సాక్ష్యమని పేర్కొన్నారు. వైఎస్ కుటుంబ సభ్యులను ఒక్కొక్కర్నీ సీబీఐ పిలిపిస్తుంటే.. అది ఇంటి గొడ్డలేనని.. సొంతింటి వేటకొడవలే వివేకాని వెంటాడిందని స్పష్టమవుతోందన్నారు. డబ్బు, ఆధిపత్యం, గనులు, అక్రమాల కోసం సొంత బాబాయినే మట్టుబెట్టిన వైఎస్ఆర్ కుటుంబ రక్త చరిత్రని జగన్ సొంత పత్రికలో ఎలా అచ్చేస్తారో చూస్తానని ట్వీట్‌ చేశారు. ‘నారాసుర రక్త చరిత్ర’ అనే శీర్షికతో ఓ పత్రికలో ప్రచురితమైన కథనాలను ట్వీట్‌కు జతచేశారు.
విజయసాయిరెడ్డి పల్స్‌రేట్‌ పడిపోతుంది: బుద్ధా వెంకన్న
వివేకానంద రెడ్డి హత్యోదంతం వెనకున్న అసలు వాస్తవాలు బయటకు రావాలంటే సీబీఐ అధికారులు వెంటనే ఎంపీ విజయసాయిరెడ్డిని విచారించాలని తెదేపా రాష్ట్ర ప్రధాన కార్యదర్శి బుద్ధా వెంకన్న డిమాండ్ చేశారు. వివేకా చనిపోయింది గుండెపోటుతోనా..? గొడ్డలిపోటుతోనా అనే సందేహం ప్రతి ఒక్కరిలోనూ ఉందన్న బుద్దా.. విజయసాయి చనిపోగానే ఘటనా స్థలానికి వెళ్లి ఆయన గుండెపోటుతో మరణించారని చెప్పింది విజయసాయిరెడ్డేనని గుర్తు చేశారు. విజయసాయి మృతదేహంపై ఉన్నవి గొడ్డలిపోట్లని చిన్న పిల్లాడికి కూడా చూస్తే అర్థమైపోతుందన్నారు. కానీ విజయసాయి ముందు గుండెపోటని, ఆ తరువాత హత్యేనని, ఆ తరువాత చంద్రబాబే చంపించారని పొంతన లేకుండా ఎందుకు మాట్లాడారని నిలదీశారు. సీబీఐ బృందం పులివెందులకు వచ్చిందంటే.. విజయసాయిరెడ్డి పల్స్‌రేట్‌ పడిపోతుందని విమర్శించారు.
క్రైమ్‌ థ్రిల్లర్‌ సినిమాను తలపిస్తోంది: కేఎస్ జవహర్
వివేకా హత్యకేసులో ప్రదాన సూత్రధారులైన విజయసాయిరెడ్డి, వైఎస్ అవినాశ్‌ రెడ్డిలను తక్షణమే విచారించాని మాజీ మంత్రి కేఎస్ జవహర్ విమర్శించారు. సునీల్‌ యాదవ్‌ కుటుంబ సభ్యులు వివేకా హత్య గురించి జగన్‌కు తెలుసని చెబుతుంటే, సీఎంను ఎందుకు విచారించట్లేదని నిలదీశారు. కేసులో సీబీఐ సునీల్‌ యాదవ్‌ లాంటి చిట్టెలుకలను బలి చేయకుండా.. సింహాలను బంధించాలని సూచించారు. వివేకానందరెడ్డి హత్యకేసు విచారణ క్రైమ్‌ థ్రిల్లర్‌ సినిమాను తలపిస్తోందన్న జవహర్.. ఆయన కుమార్తె ఇచ్చిన అనుమానితుల జాబితాలోని వారిని ఇంతవరకు ఎందుకు విచారించలేదని ప్రశ్నించారు అవసరమైతే వారికి లై డిటెక్టర్‌ పరీక్షలు నిర్వహించాలన్నారు. వివేకా చనిపోయిన రోజు రాత్రి ఏం జరిగిందో తెలియాలంటే.. ఆయన కాల్‌ లిస్టు బయటపెట్టాలని స్పష్టం చేశారు.
ఇదీ చదవండి:
CS Meeting with IAS officers: 'ఐఏఎస్ అధికారులూ.. సచివాలయానికి రండి!'
