తెదేపా అధినేత చంద్రబాబు పిలుపు మేరకు రాష్ట్ర కార్యనిర్వాహక కార్యదర్శి రెడ్యం వెంకట సుబ్బారెడ్డి కొవిడ్ రోగులను పరామర్శించారు. కడపలోని ప్రభుత్వ సర్వజన ఆస్పత్రిలో బాధితులకు ధైర్యం చెప్పారు. పార్టీ తమకు అండగా ఉంటుందని భరోసా కల్పించారు. కొవిడ్ రోగులను అంటరాని వారిగా చూడొద్దని… వారిలో ఆత్మస్థైర్యం నింపాలనే ఉద్దేశంతో ఆస్పత్రిని సందర్శించినట్లు చెప్పారు. తెదేపా నేతలు కొవిడ్ రోగులను పరామర్శిస్తే వైకాపాకు అంత ఉలుకెందుకని ప్రశ్నించారు.
తెదేపా నేతలను గృహ నిర్బంధం చేయటం పట్ల వెంకట సుబ్బారెడ్డి ఆగ్రహం వ్యక్తం చేశారు. ప్రభుత్వ లోపాలను ప్రజలు తెలుసుకోకూడదని సీఎం.. ఇలాంటి చర్యలకు పాల్పడుతున్నారన్నారు. కరోనా వ్యాప్తి వేళ జగన్… ప్రజల ఆరోగ్యంపై దృష్టి పెట్టకుండా, ప్రతిపక్ష నేతలపై అక్రమ కేసులు పెడుతున్నారని విమర్శించారు. కొవిడ్ నియంత్రణ కంటే ప్రతిపక్షాలను నియంత్రించేందుకే ముఖ్యమంత్రి ఎక్కువ సమయం కేటాయిస్తున్నారని ధ్వజమెత్తారు. కరోనా వ్యాప్తి నియంత్రణకు కృషి చేస్తున్న వైద్యులు, పోలీసులు, సిబ్బంది, పారిశుద్ధ్య కార్మికుల సేవలు ప్రశంసనీయమన్నారు.
కొవిడ్ ఆస్పత్రిని, అక్కడ అందిస్తున్న వైద్య సేవలను రెడ్యం వెంకట సుబ్బారెడ్డి పరిశీలించారు. మెరుగైన వైద్యం, రుచికరమైన భోజనం అందించాలన్నారు. కొవిడ్ రోగులకు ఆక్సిజన్ పడకలు దొరికే పరిస్థితి లేదన్నారు. ఇంట్లో ఒకరికి కరోనా వస్తే.. మిగతా వారందరికీ పరీక్షలు నిర్వహించాలని ప్రభుత్వాన్ని డిమాండ్ చేశారు. కుటుంబ సభ్యులందరూ కొవిడ్ బారిన పడి, హోం ఐసోలేషన్ ఉన్న వారికి.. ప్రభుత్వమే భోజన, వైద్య సేవలు అందించాలన్నారు. కరోనా లక్షణాలున్న ప్రతి ఒక్కరికీ వైద్య పరీక్షలు చేసి… 24 గంటల్లో ఫలితాలు వచ్చేలా చర్యలు తీసుకోవాలన్నారు. 18-45 సంవత్సరాల వారందరికీ వ్యాక్సిన్ వేయాలన్నారు. ఇప్పటివరకు 45 సంవత్సరాలు పైబడ్డ వారికే వ్యాక్సిన్ వేయని పరిస్థితి ఉందని మండిపడ్డారు. కరోనా కట్టడిలో ప్రభుత్వం పూర్తిగా విఫలమైందని విమర్శించారు.
ఇదీ చదవండి: ప్రభుత్వంపై బురద జల్లే ప్రయత్నాలను తెదేపా మానుకోవాలి: ఆళ్ల నాని
