మంచిగా చదివితే లక్ష్యం సాధించొచ్చు..బాలుడికి ఎస్పీ సూచన

ఓ చిన్నారి ఐపీఎస్ కావాలనుకున్నాడు.. ఎలాగైనా తనకు స్ఫూర్తి కలిగించిన ఏస్పీ అన్భురాజన్​ను కలిసి తన కోరికను చెప్పాలనుకున్నాడు. ఇదే విషయాన్ని తండ్రికి చెప్పగా..ఎస్పీకి సమాచారమిచ్చాడు. ఈ విషయాన్ని చెప్పిన చాలారోజులకు ఆ ఊరు వచ్చిన ఎస్పీ చిన్నారిని కలిసి.. మంచిగా చదువుకుంటే లక్ష్యం సాధించవచ్చునని సూచించారు. తమ విషయాన్ని గుర్తు పెట్టుకుని మరీ వచ్చిన ఎస్పీకి బాలుడి తండ్రి కృతజ్ఞతలు తెలిపారు.

కడప జిల్లా ఎస్పీ అన్బురాజన్​ను స్ఫూర్తిగా తీసుకొని ఖాజీపేటలోని ఓ చిన్నారి ఐపీఎస్ కావాలనుకున్నాడు. ఎలాగైనా ఎస్పీని కలిసి మాట్లాడాలనుకున్నాడు. తన మనసులోని మాటను తండ్రి రియాజ్ అహ్మద్​కు తెలిపాడు. ఇదే విషయాన్ని జూన్ 2న ఎస్పీకి తండ్రి రియాజ్ అహ్మద్ తెలపగా.. ఖాజీపేటకు వచ్చినప్పుడు తప్పకుండా కలిసి మాట్లాడతానని హామీ ఇచ్చారు.

చిన్నారి తండ్రికి ఇచ్చిన మాటను అన్బురాజన్​ ఈరోజు నిలబెట్టుకున్నారు. ఖాజీపేట పోలీసు స్టేషన్​ను సందర్శించిన అనంతరం.. చిన్నారి మతీన్ అహ్మద్​ను కలిసి యోగక్షేమాలు అడిగి తెలుసుకున్నారు. ఐపీఎస్ కావాలన్న లక్ష్యం మిమ్మల్ని చూసి కలిగిందని ఉద్వేగంతో చెప్పిన చిన్నారిలో ఎస్పీ స్ఫూర్తి నింపారు. బాగా చదువుకుని లక్ష్యం దిశగా ప్రయత్నం చేయాలని.. తన ఆశీస్సులు ఎల్లప్పుడూ ఉంటాయని ఆశీర్వదించారు.

తన కుమారుడి కోరికను గుర్తు పెట్టుకొని మరీ తమను కలిసి మాట్లాడిన ఎస్పీ అన్బురాజన్​కు రియాజ్ అహ్మద్ ప్రత్యేక కృతజ్ఞతలు తెలిపారు. విషయం తెలుసుకున్న వారు ఫ్రెండ్లీ పోలీసు అంటే ఇదే అంటూ సంతోషం వ్యక్తం చేస్తున్నారు.

ఇవీ చూడండి...