కడప జిల్లాలోని పుట్లంపల్లిలో దుర్భర పరిస్థిని నెలకొంది. అక్కడకు వెళ్లాలంటే రాళ్లు తేలిన మట్టిరోడ్డే దిక్కు. ఆ పరిసరాల్లో అత్యధిక పశువులు ఉన్న గ్రామం ఇదే! అక్కడ నివసించే వారు 800 మంది అయితే... పశువులు మాత్రం 900. కానీ ఇప్పుడు పరిస్థితి తారుమారవుతోంది. పుట్లంపల్లిలో ఒకప్పుడు అత్యధిక పశువులు ఉండేవట... అని చెప్పుకునే గ్రామం ఎంతో దూరంలో లేదేమో అనిపిస్తోంది. తాగడానికే నీరు లేని ఆ పల్లెలో పశువుల పోషణ భారమవుతోంది.
కరవు అంచున....
వర్షాభావ పరిస్థితులు పుట్లంపల్లికి శాపంగా మారాయి. ఏడాది నుంచి సరైన వర్షాల్లేక అక్కడి ప్రజలు అవస్థలు పడుతున్నారు. నీరు లేక చెరువులన్నీ ఎండిపోయాయి. భూములన్నీ దాహంతో నోళ్లు తెరిచాయి. అక్కడి కరవు పరిస్థితి సగటు మనిషికి కన్నీరు తెప్పిస్తోంది. ఒకప్పుడు సంతోషంతో ఉన్న ప్రజలు నేడు... అనుక్షణం ఇబ్బందులు పడుతూ జీవనం సాగిస్తున్నారు.
నీటికి నెలకు రూ.20 వేలు...
అక్కడి ప్రజలు నీటికి నెలకు రూ.20 వేలు ఖర్చు చేస్తున్నారంటే అతిశయోక్తి కాదు. గ్రామ సమీపంలోని పొలాల్లో ఉన్న బోరు నుంచి నీళ్లు తెచ్చుకుంటున్నారు. అయితే... దీని కోసం వేల రూపాయలు చెల్లించాల్సి వస్తోందని గ్రామస్థులు వాపోతున్నారు. ఇక 3 కిలోమీటర్లు ఉన్న కడపకు వెళ్లాలంటే... వందలు ఖర్చు చేస్తున్నామని వాపోతున్నారు. రోడ్డును చూసి ఆటోవాళ్లు వెనకడుగు వేస్తున్నారని... రూ.150 చెల్లిస్తేనే గ్రామానికి వస్తున్నారని చెబుతున్నారు.
150 ఏళ్ల చరిత్ర కలిగి పుట్లంపల్లి కరవు అంచున కాలం వెళ్లదీస్తోంది. ఒకప్పుడు ఎందరికో దాహం తీర్చిన ఆ పల్లె... ఇప్పుడు చుక్కనీటి కోసం అల్లాడుతోంది. కడపకు కూతవేటు దూరంలో ఇంతటి దుర్భర జీవనం సగటు మనిషిని కదిలిస్తోంది.
ఇదీ చదవండి : కడప రైతులకు శుభవార్త!
