Handloom Workers Agitation in AP: కేంద్ర, రాష్ట్ర ప్రభుత్వాలు చేనేత కార్మికులను నిర్లక్ష్యం చేశారని చేనేత ఐక్య కార్యాచరణ కమిటీ జాతీయ అధ్యక్షులు అవ్వారు మల్లికార్జున ఆరోపించారు. చేనేత కార్మికుల సమస్యలను పరిష్కరించాలని డిమాండ్ చేస్తూ కడప కలెక్టరేట్ ఎదుట ఆంధ్రప్రదేశ్ చేనేత ఐక్య కార్యాచరణ కమిటీ ఆధ్వర్యంలో ధర్నా చేపట్టారు. ప్రభుత్వానికి వ్యతిరేకంగా నినాదాలు చేశారు. చేనేత సొసైటీల వద్ద నిల్వ ఉన్న చేనేత వస్త్రాలను ప్రభుత్వం కొనుగోలు చేయాలని డిమాండ్ చేశారు.
చేనేత కార్మిక కుటుంబానికి మూడు సెంట్ల స్థలం : విద్యాసంస్థలతో పాటు అన్ని ప్రభుత్వ సంస్థల్లో చేనేత వస్త్రాలను వినియోగించాలని మల్లికార్జున కోరారు. జీఎస్టీ వల్ల చేనేత పూర్తిగా నిర్లక్ష్యానికి గురైందని ఆరోపించారు. తక్షణం చేనేతపై జీఎస్టీని రద్దు చేయాలని డిమాండ్ చేశారు. చేనేత సహకార సంఘాలకు చెల్లించాల్సిన బకాయిలను ప్రభుత్వం వెంటనే చెల్లించాలన్నారు. నేతన్న నేస్తం పథకాన్ని ప్రతి కార్మికుడికి వర్తింపచేయాలని, చాలా మంది కార్మికులకు నేతన్న నేస్తం అందడం లేదని పేర్కొన్నారు. చేనేత కార్మిక కుటుంబానికి మూడు సెంట్ల స్థలం మంజూరు చేయాలని కోరారు. చేనేత కార్మికుల సమస్యలను పరిష్కరించుకుంటే రాబోయే రోజుల పెద్ద ఎత్తున ఉద్యమం చేపడతామని హెచ్చరించారు.
ఇది చదవండి: Lokesh on Handloom Workers: రాష్ట్రవ్యాప్తంగా చేనేతను దత్తత తీసుకుంటా: లోకేశ్
చేనేత సమస్యలను అసెంబ్లీలో ప్రస్తావన : చేనేతల సమస్యలు పరిష్కరించాలని అనంతపురంలోని కలెక్టర్ కార్యాలయం వద్ద చేనేత కార్మిక సంఘాల నాయకులు ఆందోళన వ్యక్తం చేశారు. కలెక్టర్ కార్యాలయం ముందు బైఠాయించి ప్రభుత్వానికి వ్యతిరేకంగా నినాదాలు చేశారు. ఏళ్ల తరబడి సమస్యల కోసం కార్యాలయాల చుట్టూ తిరుగుతున్నా అధికారులు నిర్లక్ష్యంగా వ్యవహరిస్తున్నారని మండిపడ్డారు. అనంతపురం జిల్లాలో వ్యవసాయం తర్వాత రెండో స్థానంలో ఉన్న చేనేత పరిశ్రమను ప్రోత్సహించాల్సిన రాజకీయ నాయకులు అసెంబ్లీ సమావేశాల్లో ప్రస్తావించకపోవడం శోచనీయమన్నారు. అర్హులైన చేనేతలకు నేతన్న నేస్తం అందడం లేదని ఆగ్రహం వ్యక్తం చేశారు. ఇప్పటికైనా ప్రభుత్వ అధికారులు చేనేత సమస్యలు పరిష్కరించేలా చర్యలు తీసుకోవాలని డిమాండ్ చేశారు. లేనిపక్షంలో పెద్ద ఎత్తున ఆందోళన చేపడుతామని హెచ్చరించారు.
ఇది చదవండి: Handloom Weavers Problems ప్రభుత్వాలు మారుతున్న.. మారని చేనే'తలరాత'లు
చేనేత వస్త్రాలను ప్రభుత్వం కొనుగోలు చేయాలి : చేనేతలకు సంబంధించిన పదకొండు రకాల వస్త్రాల రిజర్వేషన్ చట్టాన్ని పకడ్బందీగా అమలు చేయాలని ఆంధ్రప్రదేశ్ చేనేత కార్మిక సంఘం యునైటెడ్ ఫ్రంట్ నాయకులు డిమాండ్ చేశారు. పశ్చిమ గోదావరి జిల్లా నరసాపురం సబ్ కలెక్టర్ కార్యాలయం వద్ద సమస్యలు పరిష్కారం కోరుతూ ధర్నా నిర్వహించారు. అనంతరం సబ్ కలెక్టర్ ఎం సూర్య తేజకు వినతిపత్రం అందజేశారు. ఈ సందర్భంగా జిల్లా వీవర్స్ యునైటెడ్ ఫ్రంట్ కన్వీనర్ కనకం వర ప్రసాద్, ముచ్చర్ల త్రిమూర్తులు మాట్లాడుతూ నిల్వ ఉన్న చేనేత వస్త్రాలను ప్రభుత్వం తక్షణమే కొనుగోలు చేయాలన్నారు. చిలప, నూలు, చేనేత వస్త్రాలపై విధించిన జీఎస్టీని తక్షణమే రద్దు చేయాలన్నారు. నేతన్న నేస్తం పథకాన్ని షెడ్డు మగ్గాల నేతలకు ఉప వృత్తుల కార్మికులకు కూడా వర్తింపజేయాలని కోరారు.
ప్రత్యేక నిధులు కేటాయించాలి : చేనేతలకు ముఖ్యమంత్రి జగన్ పాదయాత్రలో ఇచ్చిన హామీలను వెంటనే నెరవేర్చాలని చేనేత కార్మికులు సంఘం ఆధ్వర్యంలో కర్నూలు కలెక్టర్ కార్యాలయాన్ని ముట్టడించారు. చేనేత కార్మికులకు నేను 'విన్నాను.. నేను ఉన్నాను'.. అన్న జగన్ అధికారంలోకి వచ్చిన తరువాత ఏ ఒక్క హామీ కూడా నెరవేర్చకపోవడంతో చేనేత కార్మికులు ఆగ్రహం వ్యక్తం చేశారు. చేనేత వస్త్రాలపై జీఎస్టీని రద్దు చేసి చేనేతల అభివృద్ధి కోసం కేంద్ర, రాష్ట్ర ప్రభుత్వాలు ప్రత్యేక నిధులు కేటాయించాలని వారు డిమాండ్ చేశారు.
'చేనేతలకు సంబంధించిన పదకొండు రకాల వస్త్రాల రిజర్వేషన్ చట్టాన్ని పకడ్బందీగా అమలు చేయాలి. జీఎస్టీని రద్దు చేయాలి. చేనేత వస్త్రాలను ప్రభుత్వం కొనుగోలు చేయాలి. చేనేత సహకార సంఘాల బకాయిలను వెంటనే చెల్లించాలి. లేని ప్రభుత్వాన్ని కూల్చడానికి పెద్ద ఎత్తున ఆందోళన చేస్తాం.'- అవ్వారు మల్లికార్జున, చేనేత ఐక్య కార్యాచరణ కమిటీ జాతీయ అధ్యక్షులు
ఇది చదవండి: AP Weavers Problems: నాడు దోస్తీ.. నేడు కనీసం పట్టించుకోని పరిస్థితి
