పశ్చిమగోదావరి జిల్లా దెందులూరులో పొట్టకూటి కోసం ఓ తల్లి తన శిశువును అమ్మకానికి పెట్టింది. ఓ స్వచ్ఛంద సంస్థ దీన్ని అడ్డుకొని... పాపను శిశు గృహానికి తరలించింది. గుంటూరు జిల్లా పెదకూరపాడుకు చెందిన శిరీష తల్లిదండ్రులు చనిపోయాక... అక్కాబావ దగ్గర ఉండేది. వారూ రోడ్డు ప్రమాదంలో చనిపోయారు. వారి కుమారుడు తేజ్ సాయి పోషణ ఈమెపై పడింది. గ్రామంలో ఉపాధి లేక... మూడేళ్ల క్రితం ఏలూరు చేరుకుంది.
ఏలూరులో చిన్న చిన్న కూలి పనులు చేసుకుంటూ జీవిస్తున్న ఆమెకు బుద్దాని రవి అనే వ్యక్తి పరిచయమయ్యాడు. శిరీషతో పాటు తేజ్ని జాగ్రత్తగా చూసుకుంటానని నమ్మబలికి వివాహం చేసుకున్నాడు. తర్వాత వేరే మహిళతో వివాహేతర సంబంధం పెట్టుకొని శిరీషను వేధించసాగాడు. ఇంతలో గర్భందాల్చిన శిరీష ఆడపిల్లకు జన్మనిచ్చింది. భర్త వేధింపులు తట్టుకోలేని ఆమె.. పోలీసులను ఆశ్రయించింది.
ఆడపిల్ల పుట్టడం, శిరీష తనపై కేసు పెట్టడాన్ని భరించలేని ఆమె భర్త రవి వేరే మహిళతో వెళ్లిపోయాడు. రవి వెళ్లిన పోయిన వెంటనే అతని తల్లి.. శిరీషను ఇంటి నుంచి గెంటేసింది. దిక్కుతోచని స్థితిలో శిరీష రోడ్డున పడింది. పనుల్లేక రోజుల తరబడి ముగ్గురూ పస్తులున్నారు. చంటి బిడ్డకు పాలు చాలక గుక్కపెట్టి ఏడ్చేది.
చేతిలో బిడ్డను ఎవరికైనా విక్రయిస్తే పసిపాప సురక్షితంగా ఉంటుందని భావించింది. ఆ వచ్చిన డబ్బుతో అక్క బిడ్డకు, తనకు కొన్ని రోజులు తిండి గింజలు దొరుకుతాయని ఆలోచించింది.
దెందులూరులో తెలిసిన వారికి తన దీనస్థితి వివరించి... ఎవరైనా పిల్లలను కొనేవారు ఉంటే చెప్పాలని వేడుకుంది. ఆమె దుస్థితి తెలిసినా... బిడ్డలను అమ్మడం తప్పని భావించిన ఆమె పరిచయస్థులు... సేవ్ మిషన్ వారికి సమాచారం అందించారు. ఆ సంస్థ అధ్యక్షుడు మేడిది నికోలా సంఘటన స్థలానికి చేరుకొని ఆమెకు ధైర్యం చెప్పారు. బిడ్డ భవిష్యత్తుకై 2 నెలల పాపను శిశు గృహానికి చేర్చారు. స్థానిక అంగన్వాడీ కార్యకర్తలు, పోలీసులు శిరీష నుంచి వివరాలు తెలుసుకున్నారు.
ఇదీ చూడండి. నెల్లూరు జిల్లా: హాజరత్ మస్తాన్ వలి బాబా దర్గాలో వింత
