పశ్చిమగోదావరి జిల్లా తణుకు పట్టణంలోని ఓ మెుబైల్ దుకాణంలో చోరీ జరిగింది. ఈ కేసును పట్టణ పోలీసులు రెండు గంటల వ్యవధిలోనే ఛేదించి నిందితుడిని అరెస్టు చేశారు. పోలీసులు తెలిపిన వివరాల ప్రకారం..నూనె లీలా కుమార్ అనే వ్యక్తి పట్టణంలోని గమిని కాంప్లెక్స్లో ఉదయ్ మెుబెల్స్ పేరిట రెండేళ్లుగా దుకాణం నిర్వహిస్తున్నాడు. అతని దుకాణంలో రామసింగవరం గ్రామానికి చెందిన పొగిడి జీవ కుమార్ గతంలో నాలుగు నెలల పాటు పని చేసి మానేశాడు. అనంతరం కొన్ని రోజుల తర్వాత తిరిగి పనిలో చేరాడు.
గతంలో నమ్మకంగా పని చేయటంతో దుకాణం తెరవమని ఉదయం జీవ కుమార్కు యాజమాని తాళాలు ఇచ్చి పంపించాడు. యాజమాని లీలా కుమార్ వచ్చేసరికి దుకాణం తెరిచి ఉండగా..జీవ కుమార్ కనిపించలేదు. అనుమానించి పరిశీలించగా..రూ. 3 లక్షల 78 వేల విలువైన 21 సెల్ఫోన్లు అపహరణకు గురైనట్లు గుర్తించి పోలీసులకు ఫిర్యాదు చేశాడు. విచారణ చేపట్టిన పోలీసులు రెండు గంటల వ్యవధిలోనే కేసును ఛేదించారు. తాడేపల్లిగూడెం రైల్వే స్టేషన్లో జీవ కుమార్ను అదుపులోకి తీసుకున్నారు. అతడి నుంచి సెల్ఫోన్లను స్వాధీనం చేసుకొని..న్యాయస్థానం ముందు హాజరుపరిచారు.
ఇదీచదవండి
