విజయనగరం జిల్లా పార్వతీపురం తెలుగుదేశం పార్టీ కార్యాలయం వద్ద ఎమ్మెల్సీ ద్వారపురెడ్డి జగదీశ్వర రావు, మాజీ ఎమ్మెల్యే బొబ్బిలి చిరంజీవులు ఆధ్వర్యంలో నిరసన దీక్ష చేపట్టారు. ఎన్నికల ముందు విద్యుత్ ఛార్జీలు పెంచబోమని ప్రకటించిన జగన్... క్లిష్ట సమయంలో వినియోగదారులపై అధిక భారాన్ని మోపి మాట తప్పారని నాయకులు ఆరోపించారు.
శృంగవరపుకోటలో...
విద్యుత్ ఛార్జీల పెంపును నిరసిస్తూ తెదేపా ఆధ్వర్యంలో శృంగవరపుకోట నియోజకవర్గంలో మాజీఎమ్మెల్యే కోళ్ల లలిత కుమారి ఇంట్లోనే నిరసన దీక్ష చేపట్టారు. లాక్డౌన్ సమయంలో ప్రజలు ఇబ్బందుల్లో ఉండగా ఛార్జీల భారం మోపడం దారుణమన్నారు. పెంచిన విద్యుత్ ఛార్జీలను తక్షణం తగ్గించాలని డిమాండ్ చేశారు.
చీపురుపల్లిలో...
విద్యుత్ ఛార్జీల పెంపును నిరసిస్తూ చీపురుపల్లి నియోజకవర్గంలో తెదేపా మండల ఆధ్యక్షుడు రౌతు కామునాయుడు నిరసన దీక్ష చేపట్టాడు. పెరిగిన విద్యుత్ ఛార్జీలను తగ్గించాలని... లేకుంటే ప్రభుత్వం భారీ మూల్యాన్ని చెల్లించుకోవాల్సి వస్తుందని పేర్కొన్నారు.
