కొవిడ్ రోగుల నుంచి అధిక ఫీజులు వసూలు చేస్తే చర్యలు తప్పవని విజిలెన్స్ అండ్ ఎన్ఫోర్స్మెంట్ అదనపు ఎస్పీ స్వరూపరాణి హెచ్చరించారు. విశాఖలోని మహారాణి పేట వద్ద శ్రీ శ్రావణి మల్టీ స్పెషాలిటీ ఆసుపత్రిలో విజిలెన్స్ అండ్ ఎన్ఫోర్స్మెంట్ అధికారులు తనిఖీలు నిర్వహించారు. అదనపు ఎస్పీ జి.స్వరూపరాణి నేతృత్వంలో విజిలెన్స్ అధికారులు , ఔషధ నియంత్రణ అధికారులు సంయుక్తంగా దాడులు చేశారు. హేమ సుందరి అనే మహిళ ఇటివలే కొవిడ్ బారిన పడటంతో ఆమె కుమారుడు అనిల్ కుమార్ బిల్లా… శ్రీ శ్రావణి మల్టీ స్పెషాలిటీ ఆస్పత్రిలో చేర్చాడు. చికిత్స అనంతరం ఇటీవలే ఇంటి వద్ద ఆమె మృతి చెందింది. నిబంధనలకు వ్యతిరేకంగా తన వద్ద నుంచి 12 రోజులకి 5 లక్షలకు పైగా బిల్లులు వసూలు చేశారంటూ ఆమె కుమారుడు అధికారులకు ఫిర్యాదు చేశారు. విజిలెన్స్ అధికారులు ఆసుపత్రిలో తనిఖీలు నిర్వహించగా… ప్రభుత్వం సూచించిన ధరల కన్న అధిక ధరల వసూలు చేస్తున్నట్లు వెల్లడైంది. జిల్లా కలెక్టర్కు నివేదిక పంపించామని.. దాని అధారంగా చర్యలు చేపడతామని అధికారులు వెల్లడించారు.
ఇదీ చూడండి. ఆనందయ్య కరోనా మందు పనితీరుపై.. పరిశోధన ప్రారంభం
