గుక్కెడు నీటి కోసం గిరిజనుల అవస్థలు

ప్రభుత్వాలు, పాలకులు మారుతున్నా గిరిజనుల జీవన స్థితిగతుల్లో మార్పులు రావడం లేదు. విద్య, వైద్యం తదితర కనీస అవసరాలకూ వారు నోచుకోవడం లేదు. విశాఖ జిల్లా కొయ్యూరు మండలం జీడిపల్లిలో.. గుక్కెడు తాగునీటి కోసం కిలోమీటర్ల దూరం నడిచి వెళ్లలేక ఇబ్బందులు పడుతున్నారు. ఓటు గడ్డ నీటినే తాగుతూ.. తరచూ రోగాల బారిన పడుతున్నారు.

విశాఖ జిల్లా కొయ్యూరు మండలంలోని జీడిపల్లిలో.. గిరిజనులు ఈరోజుకీ గడ్డ నీటినే తాగుతూ అవస్థలు పడుతున్నారు. గుక్కెడు శుభ్రమైన నీటి కోసం అల్లాడుతున్నారు. తాగునీరు కావాలంటే కిలోమీటర్ల దూరం ప్రయాణించాల్సిందే. అధికారులు చుట్టపుచూపుగా వచ్చి వెళుతున్నారే తప్ప.. తమ సమస్యలు పట్టించుకోవడం లేదని ఆవేదన వ్యక్తం చేస్తున్నారు.

జీడిపల్లిలో సుమారు 50 గృహాలు ఉండగా.. 150కి పైగా జనాభా ఉన్నారు. గ్రావిటీ పథకంలో భాగంగా.. స్థానికుల కోసం కొద్ది రోజుల క్రితం నీటి కుండీని ఏర్పాటు చేశారు. తాత్కాలికంగా కుళాయిలు బిగించగా.. పది కుటుంబాల వరకు మంచినీటిని పొందుతున్నారు. మిగతా వారంతా ఓటు గడ్డ నీటినే తాగుతూ.. తరచూ రోగాలకు గురి అవుతున్నారు. ఇప్పటికైనా అధికారులు స్పందించి.. తమ సమస్యపై దృష్టి సారించాలని గిరిజనులు విజ్ఞప్తి చేస్తున్నారు.

ఇదీ చదవండి: