వ్యక్తుల ఆదాయంతో సంబంధం లేకుండా ఆస్తి పన్ను రిటర్న్ దాఖలు చేసిన వారిలో బియ్యంకార్డుదారులకు రాష్ట్ర ప్రభుత్వం రేషన్ నిలిపివేసింది. ఈ మేరకు విశాఖజిల్లా పౌరసరఫరాలశాఖ ఆదేశాలు జారీ చేసింది. ఈ నెల సరుకుల కోసం రేషన్ దుకాణాలకు వెళ్లిన వారి వివరాలు ఈపాస్ యంత్రంలో చూపించకపోవటంతో వారికి సరుకులు అందించటం లేదు. పట్టణంలో గత రెండు రోజుల్లో 400మందిలో 30మందికి సరకులు నిలిచిపోయాయని డీలర్లు తెలిపారు.
విషయం తెలియక వార్డు, గ్రామ వాలంటీర్లను వాకబు చేస్తున్నారు. ఆదాయపన్ను రిటర్న్ దాఖలు చేసి ఉండటం వల్ల సరుకులు నిలిపేశారని వారు చెబుతున్నారు. వాస్తవంగా ఐటీ పన్ను చెల్లించే వ్యక్తులకు రేషన్ నిలిపివేయొచ్చు. కానీ వివిధ అవసరాల నిమిత్తం పన్ను రిటర్న్స్ దాఖలు చేసిన వారందరికీ రేషన్ నిలిపివేయటం ఆందోళన కలిగించే అంశం.
ఉదాహరణకు ఒక వ్యక్తి జీవనోపాధి కోసం బ్యాంకులోన్ తీసుకుని ఆటో కొనుగోలు చేస్తాడు. రుణం కావాలంటే ఐటీ రిటర్న్స్ అవసరం. అవి దాఖలు చేసినంత మాత్రాన ఆదాయం పన్ను చెల్లించినట్లు కాదు. ఇవేమీ పట్టించుకోకుండా రిటర్నులు దాఖలు చేసిన వారందరికీ రేషన్ నిలిపి వేసే విధంగా ప్రభుత్వం చర్యలు తీసుకుంటోంది.
ఈనెల సరుకుల పంపిణీ పూరైన తర్వాత ఎన్ని కార్డులకు రేషన్ నిలిపివేశారో స్పష్టమవుతోందని అధికారులు చెబుతున్నారు. జీవనోపాధి కోసం బ్యాంకు రుణాల మంజూరుకు ఐటీ రిటర్న్స్ దాఖలు చేసిన పేద వర్గాలకు రేషన్ నిలిపేయటె సరైంది కాదని కార్డుదారులు ఆవేదన వ్యక్తం చేస్తున్నారు.
ఇదీ చదవండి: 'అప్పుడు బీమా ప్రీమియం కడతామంటే పరిహారం ఇస్తారా?'
