"వైకాపా పాలనతో.. తెదేపా పునాదులు కదులుతున్నాయి"

సంక్షేమ పథకాల ఫలాలను ప్రజలకు అందించడానికి రాష్ట్ర ప్రభుత్వం సిద్ధంగా ఉందని మంత్రి మోపిదేవి వెంకటరమణ అన్నారు. అవినీతిని ఎట్టి పరిస్థితుల్లోనూ సహించేది లేదని స్పష్టం చేశారు.

వంద రోజుల్లో వైకాపా ప్రభుత్వం తీసుకున్న విప్లవాత్మకమైన నిర్ణయాలతో తెదేపా పునాదులు కదులుతున్నాయని విశాఖ జిల్లా ఇంఛార్జి మంత్రి మోపిదేవి వెంకటరమణ అన్నారు. విశాఖ జిల్లా వైకాపా కార్యాలయంలో ఆయన మీడియాతో మాట్లాడారు. తమ ప్రభుత్వం అభివృద్ధికి వ్యతిరేకం కాదని... గతంలో జరిగిన అవినీతిని వెలికితీసి అభివృద్ధి కార్యక్రమాలను కొనసాగిస్తామని స్పష్టం చేశారు. విశాఖ భూ కుంభకోణాలపై మరోసారి సిట్ వేస్తామని దోషులుగా తేలిన వారిపై చర్యలు తీసుకుంటామని చెప్పారు. జిల్లాలో అన్యాక్రాంతమైన భూములను ప్రభుత్వం స్వాధీనం చేసుకునేందుకు సిద్ధంగా ఉందని తెలిపారు. ప్రజా సంక్షేమమే ధ్యేయంగా, నవరత్నాలు అమలు చేసేందుకు వైకాపా ప్రభుత్వం చిత్తశుద్ధితో పని చేస్తుందని మోపిదేవి చెప్పారు.