'విశాఖ- తిరుమల' ఎక్స్ప్రెస్ ప్రయాణికులకు తప్పని ఇక్కట్లు
విశాఖ రైల్వేస్టేషన్లో విశాఖపట్నం-తిరుమల ఎక్స్ప్రెస్ ప్రయాణికుల పాలిట శాపంగా మారుతోంది. రోజుకో కొత్త సమస్య ప్రయాణికుల్ని తీవ్రంగా వేధిస్తోంది. ఒక ఫ్లాట్ఫామ్కు రావలసిన రైలు చివరి నిమిషంలో వేరే ఫ్లాట్ఫాం పైకి రావటంతో ప్రయాణికులు ఆందోళనకు గురవుతున్నారు. 2వ నెంబర్ ప్లాట్ ఫాంపై రైలు కోసం ఎదురుచూస్తున్న ప్రయాణికులకు... అప్పటికప్పుడు 7వ నెంబర్ ప్లాట్ ఫాంకు రైలు వస్తున్నట్లు ప్రకటించటంతో పరుగులు తీశారు. సీట్ల కోసం ప్రాణాలను సైతం పణంగా పెట్టి పట్టాల మీద నుంచి దాటారు. రైలుకు ఉన్న సాధారణ బోగీల్లో కోత విధించినందువల్ల సీట్ల కోసం పరుగులు తీయాల్సి వస్తోందని ప్రయాణికులు వాపోతున్నారు. ఇప్పటికైనా అధికారులు తమ బాధను అర్ధం చేసుకుని బోగీలను పెంచాలని విజ్ఞప్తి చేస్తున్నారు.
