ఇండియా మారిటైం సదస్సు వల్ల అంతర్జాతీయ పెట్టుబడులను ఆహ్వానించేందుకు అవకాశం మరింత పెరుగుతుందని విశాఖ పోర్టు ఛైర్మన్ కె. రామ్మోహనరావు అన్నారు. మార్చి రెండు నుంచి నాలుగు వరకు జరిగే ఈ సదస్సును ప్రధాని నరేంద్ర మోదీ వర్చువల్ విధానంలో ప్రారంభించి ప్రసంగిస్తారన్నారు. 26 వేల కోట్ల విలువైన 24 అవగాహనా ఒప్పందాలు ఇప్పటికే సిద్దమయ్యాయని.. మరో నాలుగైదు వేల కోట్ల ఎంఓయూలు చర్చల దశల్లో ఉన్నాయని వివరించారు. మారిటైం సదస్సుకి సంబంధించిన ముందస్తు కార్యక్రమాన్ని విశాఖలో నిర్వహించారు.
ఇందులో స్టీవ్ డోర్స్, ఛాంబర్ అఫ్ కామర్స్, ఇతర వాణిజ్య వ్యాపార సంస్ధల ప్రతినిధులు పాల్గొన్నారు. కేంద్ర మంత్రి మాండవీయ వర్చువల్ విధానంలో దిల్లీ నుంచి ఈ కార్యక్రమాన్ని ఉద్దేశించి ప్రసంగించారు. దీనికోసం ప్రత్యేకంగా అవసరమైన సమాచారాన్ని కేంద్ర నౌకాయాన మంత్రిత్వ శాఖ కార్యదర్శి సంజీవ్ రజన్ విడుదల చేశారు. ఇప్పటికే 24వేల మంది ఆన్ లైన్లో రిజిస్టర్ చేసుకున్నారని.. విద్యార్ధులు పెద్ద ఎత్తున రిజిస్టర్ చేసుకోవాలని దీనివల్ల వారికి ఈ రంగంపై అవగాహన పెంచుకునేందుకు ఇదో అవకాశమని ఛైర్మన్ అన్నారు.
డ్రెడ్జింగ్ రంగంలో రాణించేందుకు మారిటైం ఇండియా ఓ సదావకాశం..
డ్రెడ్జింగ్ రంగంలో అభివృద్ధికి ఉన్న అవకాశాలను పెట్టుబడులకు ఉన్న భరోసా వంటివి తెలుసుకునేందుకు మారిటైం ఇండియా సదస్సు ఉపకరిస్తుందని, డ్రెడ్జింగ్ కార్పోరేషన్ ఆఫ్ ఇండియా ప్రత్యేక అధికారి ప్రొఫెసర్ జీవైవి విక్టర్ అన్నారు. మార్చి రెండు నుంచి జరిగే ఈ సదస్సులో మారిటైంలో ఉన్న వివిధ అనుబంధ రంగాల్లో పెట్టుబడుల ద్వారా పెద్ద ఎత్తున అవసరమైన అభివృద్ధికి అవకాశాలు ఉన్నాయని ఆయన వివరించారు.
ఈ సదస్సు కోసం పోర్టు, డ్రెడ్జింగ్ కార్పొరేషన్, ఇతర అనుబంధ సంస్థలు రోడ్ షోలను నిర్వహించాల్సిందిగా కేంద్రం నౌకాయాన మంత్రిత్వశాఖ ఆదేశించింది. తమ సేవలను ఉపయోగించుకునే వ్యాపార, వాణిజ్య సంస్థలు విద్యార్థులు ఈ అవకాశం వినియోగించుకోవాలని కోరారు. డ్రెడ్జర్ల నమూనాలు, విడిభాగాల ప్రదర్శన కూడా ఈ సందర్భంగా ఏర్పాటు చేశారు.
ఇదీ చదవండి:
